Aningaasaliissuteqarnissamik kissaateqarnissaq Løkkep utaqqivaa
Danskillu soraarnerutisianut akilersuiffiat angisuujusoq peqataanissamut aamma piareersimavoq.
Naalakkersuisulli nammineerlutik taama kissaateqarlutik saaffiginneqqaassapput - tamannalu suli pinngilaq.
Kalaallit Nunaanni inuussutissarsiornissamik suliniuteqarnissaq pillugu danskit akileraarutaannik aningaasalersorneqartumik aningaasaliinissamut aningaasaateqarfeqatigiinnissaq, Nunatsinni Danmarkimilu politikerit inuussutissarsiortullu ukiut marluk sinnerlugit eqqartugaraat.
Isumassatsialallu taanna ministeriunerup Lars Løkke Rasmussenip Nunarput peqatigigalugu eqqartorusuppaa.
Folketingimi oqaaseqarnermi qanittukkut taama oqaaseqarpoq:
- Danskit-kalaallillu - kalaallit-danskillu - suleqatigiinnerannit tapersiisinnaanerup eqqartornissaa soorunami ammaffigaarput, Lars Løkke Rasmussen oqarpoq.
Kalaallit Nunaat nammineq suliniuteqartariaqarpoq
Eqqarsaat imaappoq, Nunatsinni sulianik annertuunik ingerlatsinermi danskit naalagaaffiat nunattalu karsia siulliullutik aningaasaliippata taava peqatigiiffiit namminersortut aamma aningaasaliinissaminnut tunuarsimaassanngillat.
Ataatsimoorussamilli aningaasaateqarfeqarnerup kissaatigineqarnera toqqaannartumik naalakkersuisuninngaanneersuussasoq, Løkkep oqaatigaa. Kissaalli taanna maannamut suli oqaatigineqangilaq.
- Kalaallit Nunaatalu aningaasaqarnera Kalaallit Nunaata nammineq akisussaaffigaa, taamaammat suliniuteqarnerit taakannga aallartinneqartariaqarput. Kalaallillu Nunaanniit ineriartortitsinissamik ataatsimoorussamik aningaasaateqarnissamut siunnersuummik tigusaqanngilagut.
Tamannalu peqatigiiffinnit ilaatigut Pension Danmarkimit aamma ajuusaarutigineqarpoq.
Danmarkimi pensionskasse aningaasaliinissamut piareersimavoq
Uanimi danskit soraarnerussutisiassanut akilersuivianni pisortaq Torben Möger Pedersen, Kalaallit Nunaanni pingaartumik ataqatigiinnermut atortulersuutissanut - soorlu aqqusinernik, umiarsualivinnik, qaammataasianut internetimut atorneqartussanut aningaasaliinissaminut piareersimavoq.
- Piffissami sivisuumi aningaasaliisartutut aningaasaliinissarput tulluarsinnaavoq. Naalakkersuisulli peqataasariaqarput, Torben Möger Pedersen oqarpoq.
- Nunami oqartussaasut peqataannginneranni qaammataasianik kaaviiaartitsisunik pilersitsisoqarsinnaanngilaq. Nunani oqartussaasut peqataalluannginneranni aqqusinernik, umiarsualivinnik nutaanik sanaartortoqarsinnaanngilaq.
Taamaammat taannaannarpiaq pillugu pisortat namminersortullu aningaasaateqarfiannik peqartariaqarpoq.
Taamaammallu aningaasaliisartumik aningaasaateqarfeqarnissaq pillugu naalakkersuisut Danmarkimut saaffiginninnissaat, Torben Möger Pedersenip neriuutigaa.
- Kalaallit Nunaanniit danskit kalaallillu pisortat namminersortullu avitseqatigiillutik aningaasaateqarfigisaannik pilersitsinissaq torrattumik isigineqarpat, Lars Løkke Rasmussenip qanittukkut qaaqqusiffigisaannut, danske pensionspenge oqalliseqataanissamut suliniuteqarusuppoq.
Aamma atuaruk Aningaasaateqarfimmik pilersitsinissaq danskit kalaallillu ataatsimoorullugu siunnersuutigaat
Nunatsinni inuussutissarsiuteqarnermut suliniuteqarnissat pillugit pisortat namminersortullu ataatsimut aningaasaliisumik aningaasaateqarfissaat Demokraatit, Det Radikale Venstre peqatigalugu 2014-imi siunnersuutiginikuuaat.