Aningaasaateqarfimmik pilersitsinissaq danskit kalaallillu ataatsimoorullugu siunnersuutigaat
- Aningaasaliissutillumi tamakkua nunarsuarmit tamarmeersuusinnaapput, kisianni soormi aningaasat pisariaqartut Naalagaaffeqatigiinnerup iluani nassaariniarnianngilagut? Demokraatit Radikale Venstrellu siunnnersuutigaat, danskit naalagaffiannit soraarnerussutisiaqarnissamullu aningaasaateqarfiit aningaasalersugaanik Kalaallit Nunaannut aningaasaliisarfimmik aningaasaateqarfiliortoqassasoq, Kalaallit Nunaanni aningaasaliissutinik amerlasaassutaasussanik, taakkua ilatigut inerisaanermut, silap pissusiata allanngoriartornerani naleqqussarnissamut, nukissiutinut, takorniaqarnermut, aalisarnermut, nunalerinermut aatsitassanillu piiaanermut atorneqassallutik.
Siunnersuutigaat, aningaasaateqarfik taanna danskit silap pissusiaata allanngoriartorneranut naapertuussarnermut aningaasaateqarfiattut aaqqissuunneqassasoq, annaasaqaratarsinnaanermut piareersimanissaq taamaalilluni qulakkeerneqarsinnaammat taavalu danskit suliffeqarfiutaat, Nunatsinni aningaasaleerusuttut pitsaanerusumik siunersornerqarsinnaaniassammata.
Aamma tikuarpaaat, amerlanerusunik sammivilimmik inuussutissarsiornikkut ineriartortitsinermi periusissiornikkut Danmark Kalaallit Nunaallu nukittunerulissapput, nunani taakkunani inuussutissarsiornikkut toqqavik patajaannerusoq pilersinneqassammat.
- Taamaammat aningaasaliisarfimmik aningaasaateqarfiliorneq pisuussutinut uumasunut illersuutaassooq, Kalaallit Nunaani pinngortitap illersornerqarnera qulakkeerneqarluni, taavalu danskit suliffeqarfiutaasa alliartoqqinnissaat qulakkeerlugu. Suleqatigiinnissaq nukiillu katinnerisigut pissarsiassat pivagut, Anda Uldum aamma Chr. Friis Bach erseqqisaapput.
Aamma aallapput, nunatta pisuussutaanik piiaanissarsuaq namminersulernissamut avissaarnisamullu aqqutitut ilaannit isiginiarneqartartoq.
- Aammami taamaassinaavoq. Kisianni aatsitassanik piiaanissat naalagaaffeqatigiinnermmik nukittorsaanissatsialattut uagut isigaarput. Taamaassaappali nunavut marluk taakkualu oqartussaat suleqatigiinnerujussuusariaqarput. Nukiginnarsivorlu. Piffissaq akerleriinnermut namminersornermilu isummanik tunngasiusunik oqallinermut atorpallaaqaarput, uffa suleqatigiittariaqarluta tamatsinnullu iluaqutissanik inerisaasariaqarluta, Demokraatit siulittaasuat Anda Uldum aamma Det Radikale Venstret Folketingimi gruppianni siulittaasoq, nunat ineriartortut pillugit ministeriusimasoq, Christian Friis Bach Berlingske Tidendemi ullumi allapput.
