Randi: Aningaasalersuisartut avataaneersut isiginiarsinnaanerusariaqarpagut

Nunatsinni politikerit inuussutissarsiutitigut suliniutinut angisuunut tunngatillugu nunani allani periarfissat isiginiarnissaat pikkoriffiginerusariaqarpaat, tamanna inuiaqatigiinnut iluaqutaassammat.

Aningaasaqarnermut naalakkersuisoq Randi Vestergaard Evaldsen taama oqarpoq.

Nunanimi allani aningaaseriviit aningaasaateqarfiillu aningaasalersuisartut Issittumi aningaasalersuinissamik kissaateqarput.

Taakku ilagaat Nunani Avannarlerni Aningaasalersuinermik aningaaserivik, Den Nordiske Investeringsbank, issittumi piffissaq ungasinnerusoq eqqarsaatigalugu aningaasalersuinissamut 500 millionit koruuninik - 3,8 milliardit koruunik missaannik immikkoortitsisimasoq.

Aningaaserivilli Nunatsinni suli aningaasalersuisimanngilaq. Aningaasat taakku aningaaserivinnut oqartussaasunuluunniit tunniunneqassapput, taamaaliortoqarneratigullu Nunatsinni suliniutinut taarsigassarsisitsinerit qularnaveeqqusernerat annertunerulissalluni.

Tamannalu Nunatsinni aningaasalersuinermut tunngatillugu eqqarsartaatsimik allanngortitsisoqartariaqarneranik pissuteqarsinnaasoq Randi Vestergaard Evaldsenip KNR-imut oqaatigaa.

- Nunatta karsiata nunatsinni aningaasalersuisussaanera ukiorpassuarni isiginiarneqarpallaarsimavoq. Taamaammat nunatsinni allatut eqqarsartoqartariaqarpoq, aningaasalersuisartut nunanit allaneersut, soorlu aningaasalersuisarfittut aningaasaateqarfiit soraarnerussutisiaqalernissamullu aningaasaateqarfiit (…). Politikerit innuttaasullu akornanni tamanna paasilluarneqartariaqarpoq.

Naalakkersuisut aningaasalersuisoqarnissaa taperserpaat ​

Soqutiginnittoqaraluartorlu Nunatsini politikerit inuussutissarsiutinillu ingerlataqartut mianersortariaqarput, aningaasalersuerusuttummi aamma pissarsiaqaateqarfiginiarlugu aningaasalersuisarmata, Randi Vestergaard Evaldsen oqarpoq.

Naalakkersuisulli aningaasalersuisartut Nunatsinnut tikilluaqqunissaannut sapinngisaminnik suliniuteqartut aamma oqaatigaa.

- Angalagaangatta ataatsimiikkaangattalu periarfissaqartilluta qaqittarparput, nalunnginnatsigu pingaaruteqartuusoq. Aamma Nunarput ataasiusutut assigiinngitsorpassuartigut nittartaanniartarparput, taamaaliornikkut Nunatsinni aningaasaliinissaq soqutiginartuusoq takutinniarlugu.

Inuussutissarsiornerup ineriartortinneqarnissaanut aningaasaateqarfik,Vækstfonden, danskit naalagaaffiata ataaniittoq aamma Europami Aningaasalersuisarfittut aningaaserivik, Den Europæiske Investeringsbank, tamarmik immikkut Nunatsinni suliniummut ataatsimut maannamut aningaasaliisimapput.

Transportkreditfonden juulip aallaqqaataa aallarnerfigalugu Nunatsinni suliniutinut taarsigassarsisitsisalerniarpoq, aamma Pension Danmark nunanilu tamalaani aningaasalersuisarfittut ingerlatseqatigiiffissuaq Guggenheim Partners Issittumi aningaasalersuinissamik kissaateqarlutik oqaatigisimavaat.