Immikkut ilisimasalik Rusland Issittumi Siunnersuisoqatigiinnut akiliuteqassaassammat: :- Aningaasaqarnermut ajoqutaanavianngilaq
Rusland Issittumi Siunnersuisoqatigiinnut akiliuteqassaassaaq.
Ruslandip nunanut allanut tunngasuni ministereqarfia Ruslandimi nutaarsiassaqartitsivimmut RIA-mut pingasunngornermut unnuaani nalunaarpoq.
Issittumi Siunnersuisoqatigiit missingersuutiminik 14-erarterutaat taamaalillutik annaassavaat. Taakku 2021-mi missingersuutaat katillutik 13,8 millionit norskit koruuniusut, Issittumi Siunnersuisoqatigiit ukiumut nalunaarutaanni 2022-meersumi erserpoq.
Ruslandip taakkununnga 2021-mi akiliutaat 1 millionit norskit koruuningajalluinnaapput, tassa 656.000 koruuningajalluinnaapput.
Taamaammallu Ruslandip akiliuteqassaartussanngornera Issittumi Siunnersuisoqatigiit aningaasaqarnerannut suliaannullu sunniuteqangaarnavianngitsoq, illersornissamik Københavnimi ilisimatusarfiup periusissiornermut sorsunnernillu ilisimatusarnermut immikkoortuani adjunkti Marc Jacobsen oqarpoq.
- Issittumi Siunnersuisoqatigiit massakkorpiaq suliakilluinnarmmata Ruslandip akiliuteqassaartussanngornera aningaasaqarnerannut akornutaanavianngilaq. Siornatigorninngarnillu suliakilluinnaramik aningaasarpassuarnik massakkorpiaq pisariaqartitsinngillat.
Issittumi Siunnersuisoqatigiillu piffissami aggersumi suliaqarneruleqqissagaluarunik 1 millionit norskit koruuningajalluinnarnik annaasaqarnertik malugissasimagaluarlugu suliaannut sunniuteqangangaarnavianngitsoq, Marc Jacobsen oqarpoq.
Issittumi Siunnersuisoqatigiimmi ukiumut missingersuutaasa affaasa missarluinnaat nunat siunnersuisoqatigiinni ilaasortat katillutik arfineq-pingasuusut akiliutaanneersuusarput. Issittumi Siunnersuisoqatigiit Norgemi Tromsømi allattoqarfeqarmata taakku missingersuutaasa sinneri Norgep akiliutaanneersuusarput.
Immikkut ilisimasalik: Ruslandip Issittoq pissaaneqarfiginiarsarigaa
Ruslandip Ukrainemut 2022-mi februaarimi saassussilluni aallartinnerata kingornali, Rusland nunat Issittumi Siunnersuisoqatigiinni ilaasortaaqatinilu suleqatigiilluarunnaarput.
Issittumi Siunnersuisoqatigiinni sulineq unikkallassasoq, Danmark nunallu allat siunnersuisoqatigiinni ilaasortat Rusland peqataatinnagu isumaqatigiipput.
Sulialli unitsikkallarsimasatik ilaat isumaqatigiinnerminniit qaammatialuit qaangiummata, tassa 2022-mi juunimi nangippaat. Suliat nangitaat siunnersuisoqatigiinni suleqatigiissitat arfinillit Ruslandip peqataaffiginngisaanik suliniutaannut tunngasuupput.
Aningaasaqarnermut ajoqutaanavianngitsoq politikkikkulli sulinerannut sunniuteqartussaassaaq. Tassa Ruslandip akiliuteqassaartussanngornera siunnersuisooqatigiinni suleqatigiinniarneq ajornartoorfeqariaannarneranik kinguneqassasimasoq, Marc Jacobsen oqarpoq.
- Tassa Ruslandip Issittumi Siunnersuisoqatigiinni suleqataarpiarunnaartussanngorneranik ersersitsivoq. Suleqatigiinniarnikkut ajornartoorfeqarnerat Ruslandip akiliuteqassaarniarneranut pissutaagunavippoq.
Ruslandip akiliuteqassaarniarluni 2022-miliunngitsoq aatsaalli maanna nalunaarnera ilaatigut Ruslandip nunallu allat siunnersuisoqatigiinni ilaasortat akornanni naammagittarniarnerannik pissuteqassasimasinnaasoq, Marc Jacobsen oqarpoq.
Ruslandilli taama aalajangernera uissuumminanngitsoq, Marc Jacobsen aamma oqarpoq.
Issittumi Siunnersuisoqatigiinnimi ilaasortaaqatani ilasseraanngiinnarniarunik ilaasortaajunnaarnissi isumaliutigilerniarini, Ruslandip Issittoq pillugu periusissiamini kingullermi 2022-mi saqqummersitamini oqaatigikumisaarpaa.
Ruslandili ilumut taamaaliorniarnersoq eqqarisaanit ilisimaneqaavinngitsoq, Marc Jacobsen oqarpoq.
- Rusland Issittumi siunnersuisoqatigiiginnarnissaminut sunik piumasaqarnerluni ersarinnerusumik tusarliissiivarput. Ilumut taamaaliorniarnersoq nalileruminaappoq, taamaaliornissaali aatsaat taama ilimanartigaaq.
