Folketingimut ilaasortaq: Issittumi Siunnersuisoqatigiit Ukrainemi sorsunnerup kingorna aallarteqqissinnaanngillat

Issittumi Siunnersuisoqatigiit pilerseqqinneqaqqissinnaanissaanut takussutissaqanngilaq. Folketingimi ilaasortaq, nunanut allanut tunngasunut ministeriusimasoq, Martin Lidegaard (R) taama naliliivoq.

Issittumi Siunnersuisoqatigiit Ukrainemi sorsuttoqalerneratigut suleqatigiikkunnaartut taassuma Altinget.dk-mut oqaaseqarluni allappaa, taassumalu Issittumi pingaaruteqartumik aalajangiinerit EU-mi Nato-milu suliarineqartalernissaat ilimagaa.

- Taamaammat Naalagaaffeqatigiit tamarmiusoq suleqatigiiffinni taakkunani marlunni akuunerusariaqartoq, politikeri kaammattuivoq.

Issittumi Siunnersuisoqatigiinni naalakkersuisut Reykjavikkimi siorna maajimi ataatsimiipput, tassanilu USA-p nunanut allanut tunngasunut ministeria, Antony Blinken taassumalu russeq suleqataa, Sergey Lavrov peqataapput.

Issittumit nuanut allanut tunngasunut ministerit issittumi ajornartorsiutaasut pillugit suleqatigiiginnarnissamik suleqatigiinnerulernissamillu isumaqatigiissut ataatsimiinnermi atsioqatigiissutigineqarpoq.

Nunap inoqqaavisa illersorneqarnerat, attanneqarsinnaasumik aningaasaqarnikkut ineriartorneq, silap pissusia, Issittumi avatangiisit uumassusillillu kiisalu Issittumi Siunnersuisoqatigiit pitsaanerusoq ilaatigut oqaluuserineqarpoq.

Rusland ataatsimiinnermi taamani siulittaasunngorpoq.

Maannali qaammatit quliunngitsulluunniit qaangiuttut nunanit ilaasortaasunit arfineq-pingasunit arfineq-marluk tunuarput, Ruslandilu kiserngorullugu.

Ruslandip Ukrainemut saassussineranut akerliuneq peqqutaavoq.

Allanngornerlu taanna Naalagaaffeqatigiinniittut tamarmik sungiuttariaqaraat, Martin Lidegaard allappoq.

- EU NATO-lu Issittumut tunngatillugu akuunerulissapput, issittumi inunnut aalajangiinerit annertuut arlallit taakkunani aalajangiiffigineqartassapput – tamanna Ruslandip peqataaneratigut peqataannginneratigulluunniit, taanna allappoq.

- Taamaammat Kunngeqarfimmiittut tamarmik aningaasaqarnermi, avatangiisinut aamma sillimaniarnermut politikkikkut soqutigisanik EU Natolu suleqatigalugit pitsaanerpaamik qulakkeerisinnaassallutik, Det Radikale Venstremeersoq Martin Lidegaard Altinget.dk-mut allappoq.