Rusland Issittumi Siunnersuisoqatigiinnut ukiumoortumik akiliuteqassaassasoq
Ruslandip Issittumi Siunnersuisoqatigiinnut ukiumoortumik akiliutigisartakkani unitsippai.
Ruslandip nunanut allanut tunngasunut ministereqarfia Ruslandimi nutaarsiassaqartitsivimmut RIA-mut taama ilisimatitsisoq, nutaarsiassaqartitsivik Reuters allappoq.
Issittumi Siunnersuisoqatigiinni Ruslandip nammineq oqarnera naapertorlugu ilumoortumik aatsaat sulisoqaqqilerpat aningaasaleeqqittalerniarnini Ruslandip nunanut allanut tunngasunut ministereqarfiata nalunaarutigaa.
- Nunat tamarmiullutik Issittumi Siunnersuisoqatigiinni aatsaat suleqatigeeqqilerpata Rusland akiliisaleqqinniarpoq, taamaannerani ukiumoortumik aningaasaliisarnianngilaq, Ruslandip nunanut allanut tunngasunut ministereqarfia oqarpoq.
Ruslandili Issittumi siunnersuisoqatigiinnit maannakkorpiaq anilersaanngitsoq, Ruslandip nunanut allanut tunngasunut ministereqarfia ilisimatitsivoq.
Rusland Issittumi siunnersuisoqatigiinnut qanoq akiliuteqartigisarnersoq ilisimaneqanngilaq.
Ruslandip Ukrainemut 2022-mi februaarimi saassussilluni aallartinnerata kingornali, Issittumi Siunnersuisoqatigiinni sulineq unikkallarpoq. Rusland peqataatinneqarani Danmark nunallu arfnillit allat taamaaliornissamik isumaqatigiipput.
Sulialli unitsikkallarsimasatik ilaat aallarteqqinniarlugit, isumaqatigiinnerminniit qaammatit pingasut qaangiuttut tassa 2022-mi juunimi aalajangerput.
Suliat aallarteqqitaat siunnersuisoqatigiinni suleqatigiissitat arfinillit Ruslandip peqataaffiginngisaata suliniutaannut tunngasuupput.
Ruslandip nunanut allanut tunngasunut ministereqarfiata oqaaseqartartua, Maria Zakharova, Issittumi Siunnersuisoqatigiit pillugit aamma oqaaseqarpoq. Russit nutaarsiassaqartitsiviat Tass sapaatit akunnerata siuliani taama allattoq, nutaarsiassaqartitsivik Reuters allappoq.
Tassa Issittumi Siunnersuisoqatigiit Ruslandimut ilasseraanngisaarniaannarunik Ruslandip ilaasortaajunnaarnissi isumaliutigilissagaa, Maria Zakharova oqartoq Reuters allappoq.
Ritzauikkormiut Danmarkip nunanut allanut tunngasunut ministereqarfianeersut tamanna pillugu oqaloqatiginiarsaraat.
