Aningaasaateqarfik kalaallinut arfineq-marlunnut aningaasaliivoq

Ivalo & Minik Fonden-imiit aningaasanik katillugit 300.000 koruuninik, nunarsuup ilaani ilisimatusartussanut arfineq-marlunnut agguaapput.
Ilinniartunut aningaasaateqarfiup ateqaatigai Ivalo aamma Minik - kunngissakkut qitornaanni nukarliit marlulissat atimik ilaanni kalaallisut atillit prinsesse Josephine aamma prins Vincent. Assi © : Brian Mølgaard/KNR
Allattoq Nicole Sander Bertelsen
decembarip 04-at 2023 10:46
Nutserisoq Najâraq Egede

Ivalo & Minik Fonden kalaallinut nunanut allanut ilinniariarniartunut aningaasaateqarfiusoq nunanut allanut ilisimatusariartortussanut arfineq-marlunnut aningaasaliissuteqarpoq.

Aningaasaateqarfik tusagassiorfinnut taama nalunaarpoq.

Aningaasallu 300.000 koruunit sinneqalaartut agguaanneqarsimapput.

- Malugaarput, aningaasanik agguaassinerit tamaasa qinnuteqaatinik pitsaalluinnartunik tigusisalernerput, tamannalu nuannaarutigaarput.

- Nuannerpoq taama amerlatigisut pilerigilluinnakkaminnik ilinniagarerusutartik Kalaallit Nunaanni Danmarkimilu nalunngilluinnagartik toqqissisimaffitsillu qimallugit pikkorissarusulernerat, Minik Rosing Ivalo & Minik Fonden-imi siulersuisunut siulittaasuusoq oqarpoq.

Kalaallit Nunaannut iluaqutaalerumaartut neriuutigaat

Kalaallinut Hollandimi, Tuluit Nunaanni aamma Australiami ilinniagaqarusuttunut aningaasanik agguaasoqarpoq. Ilinniagaat ilaatigut tassaapput Nunarsuarmi tamarmeersut niuernermik qaffassarfik aamma aalisarnermi teknologimik ilinniarneq. 

Nunanut allanut ilinniariarnerat inuiaqatigiinnut kalaallinut kingorna iluaqutaalerumaarnissaa siulittaasup neriuutigaa.

- Neriuppugut, tamarmik annertuumik ilikkagaqassasut Kalaallit Nunaannullu uterlutik piginnaasatik atussagaat, Minik Rosing oqarpoq.

Ivalo & Minik FOndenimit ukiaanerani aningaasaliiffigineqartut

Victor Langholz aningaasaliiffigineqarpoq ilinniagaqarnissaminut Master of Science i International Business  HULT International Business School i London, Tuluit Nunaanni.

Sigrid Christiansen aningaasaliiffigineqarpoq Sverige-mi Leksand Folkhögskola-mi atuakkanik atuakkanik ungalulersuisutut ilinniaqqinnissaminut.

Najârak Demant-Poort Ilisimatusarfimmi Phd-nngorniarnerminut atasumik ukikup affaa ilinniarnissaminut/ilisimatusarnissaminut Oslo-mi Institutt for Samfunnsforskning aningaasaliiffigineqarpoq.

Najannguaq Berthelsen Islandimi gletsjerguide-itut ilinniaqqinnissaminut aningaasaliiffigineqarpoq.

Edna Lyberth aningaasaliiffigineqarpoq semesteri ataaseq Perth-imi University of Western Australia DTU-mi fiskeriteknolog-imut ilinniarnermik.

Annika Christiansen aningaasaliiffigineqarpoq semesterimi ataatsimi Australiami University of the Sunshine Coast Københavns Professionshøjskolemi Natural & Cultural heritage ilinniarnerminut atasumik ilinniariarnissaminut.

Amaasa Olsen aningaasaliiffigineqarpoq Sociologimi Masteritut Hollandimi University of Amsterdam  ilinniarnissaminut.

Ivalo & Minik Fonden-ip siulersuisui ukiumut marloriarlutik aningaasanik agguaassinissamut naapittarput, naapinnerminni aningaasaateqarfiup tapiisartuisa - Royal Greenland-ip Royal Arctic Line-p NunaFonden-ip aamma . GrønlandsBANKENip inuussutissarsiutinut aningaasaateqarfiata - tunniussaat kimut tunniunneqassanersut nalilersortarpaat. Qinnuteqarnissamut killigititaq tulleq tassaavoq februaarip 15-iat 2024. Siulersuisut tulliani agguaanissamut atatillugu amerlasuunik pitsaasunillu qinnuteqaatinik tigusissallutik neriuutigaat.

Aamma atuaruk

Angutit pingasut toqutseriarsimasutut peqqarniitsumillu nakuusersimasutut eqqartuussivimmi unnerluutigineqartut

Nunani allani inatsisiliortuni nutserinermut aningaasartuutit ima amerlatigipput

Ritzau

Palæstiinamiut erfalasuat Malmö Arenami Eurovisionimut nassarneqaqqusaassanngitsoq