Angutit pingasut toqutseriarsimasutut peqqarniitsumillu nakuusersimasutut eqqartuussivimmi unnerluutigineqartut

Eqqartuussisoqarfik Sermersuup inuit pingasut suliami ataatsimi unnerluutigineqarnerannik maanna suliaqaleruttorpoq.

Eqqartuussivimmi suliaq kannguttaalliornermut toqutseriarnermullu atatillugu tigusarinninniarnermi politiimut qaarmiisimanermit unnerluussusutinik ilaqarpoq.

Taamaammat unnerluutigineqartut pingasut pillugit suliap qaammassineqarnerani qaammatini arlalialunni pineqaatissinneqarsimasunut inissiisarfimmiitsitsisussanngornermik aamma kinguneqarsinnaavoq.

KNR-ip takunniffigisinnaatitaaffigisaani unnerluussissummi aqqanilinnik quppernilimmi tamanna atuarneqarsinnaavoq.

Pissutsit marluk initunerusut

Angutinut pingasunut atatillugu pissutsit amerlapput, tassa katillugit 21-upput, siullerlu 2020-mi decembarimi pisimasuulluni. Taamaakkaluartorli siorna apriilimi toqutseriarneq qaammatillu sisamat qaangiunneranni peqqarniitsumik nakuuserneq suliami matumani pingaarnertut pissutaasut, suliami unnerluussisussaatitaasoq, Signe Suhr Mortensen oqarpoq.

Pissutsit taakku tamarluk pingaarnertut pissutaanerat unnerluussisussaatitaasup oqarnera naapertorlugu marlunnik pissuteqarpoq.

Pissutsini taakkunani marlunni peqqarniitsumik pinerluuteqarsimasutut unnerluutiginnittoqarpoq, unnerluutigineqartut marluk siorna septembarimi pissummut atatillugu tigusarineqaramik tamarmik tigummigallagassanngortinneqartut, unnerluussisussaatitaasoq, Signe Suhr oqarpoq.

Paarineqartussanngortitsisoqarnissaa innersuussutigineqartoq

Angutit pingasut 28-nik, 29-nik 31-nillu ukiullit unnerluutigineqarput.

28-nik ukiulik pissutsinit 21-nik 13-ini unnerluutigineqarpoq, taassuma pissutsit amerlanerpaartai nassuerutigai. Unnerluussisussaatitaasullu piumasaqaataa isumaqatigineqassappat taanna ukiumi ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqassaaq.

31-nik ukiulik suliami pissutsinit marlunni unnerluutigineqarpoq, tassani pingaarnertup pissutaasup aappaani. Taanna eqqartuussut alla pissutigalugu manna pineqaatissinneqarsimasunut inissiisarfimmiitsinneqarpoq.

Unnerluutigineqartoq kingulleq angutaavoq 29-nik ukiulik taanna pissutsinit 21-nit qulini unnerluutigineqarpoq. Pingaarnertut pissutaasut marluk aamma tarnikkut misissuineq tunngavigalugu nakorsat, tarnip pissusianik ilisimasallit nakorsallu eqqartuussinermi siunnersuisartut angutip paarineqartussanngortinneqarnissaa innersuussutigaat.

Taamaammat tamanna unnerluussisussaatitaasumit piumasaqaataasup, Signe Suhr Mortensenip oqaatigaa.

Eqqartuussivimmi suliamut ullut arfineq-pingasut atorneqarneqarnissaat inissinneqarnikuupput. Unnerluutigineqartummi immikkoorlutik pissutsinik arlalinnik nassuerutiginnereermata eqqartuussivimmi suliaq sivikinnerusinnaavoq.

Taamaammat unnerluussisussaatitaasup sapaatip akunnerata tulliata naanerani eqqartuussuteqartoqarnissaa naatsorsuutigaa.