Arnaq toqutseriarsimasutut pinngitsuutinneqartoq nakuusersimasutulli eqqartuunneqartoq
Arnap 33-nik ukiullip Eqqartuussisoqarfik Sermersuumi unnerluutigineqarnera ataasinngornermi aallartittoq naammassivoq.
Arnaq allamik toqutseriarsimasutut, nakuusersimasutut sakkortuumilli iliuuseqarsimasutut unnerluutigineqarpoq. Pissutsit sisamat tamarmik 2019-imi oktobarimi pisimasuupput.
KNR eqqartuussivimmi suliap aallartinnerani najuuppoq, eqqartuussisorli eqikkaasoqarnissaanut inerteqquteqarpoq, taamaammallu suliap naammassinera taamaallaat KNR-imit saqqummiussinnaavarput.
Arnaq toqutseriarsimasutut eqqartuunneqarani peqqarniitsumik nakuusersimasutut eqqartuunneqarnissaa eqqartuussiviup aalajangerpaa.
- Unnerluutigineqartup toqutseriarsimasutut eqqartuunneqarnissaanut uppernarsaatit naammanngitsut eqqartuussiviup aalajangerpaa, Pinerluttulerinermilli inatsimmi peqqarniitsumik nakuusernermut tunngasumik eqqartuunneqarluni, Kalaallit Nunaanni Politiit KNR-imut allakkatigut oqaaseqaammi allapput.
Eqqartuussut arnap pinerluttunik isumaginnittoqarfimmit ukiumi ataatsimi nakkutigineqarnissaanik pinerluuteqarsimasunullu inissiisarfimmiissannginneranik isumaqarpoq.
Tamatuma saniatigut politiit suliamik Nunatta Eqqartuussisuuneqarfianut ingerlatitseqqiissanerlutit isumaliutiginiarlugu eqqartuussutip allaganngortinneqarnissaa utaqqillugu paasissutissiissutigaat. Taakku ullumik 14-inik eqqarsarfissaqarput.
