Suliaq ukiunik tallimanik pisoqaassusilik toqutseriarnermut nakuusernermullu tunngasoq eqqartuussivimmi suliarineqalersoq
2019-imi oktobarimi unnukkut arnap 33-nik ukiullip toqutseriartutut nakuusersimasutullu pasineqarneranik ullua naavoq.
Tamanna KNR-ip allagaatinik takunniffigisaani unnerluussummi Eqqartuussisoqarfik Sermersuumi ataasinngornermi suliarineqartussami atuarneqarsinnaavoq.
Taamaammat arnaq toqutseriarsimasutut nakuusersimasutullu maanna unnerluutigineqarpoq. Ataasiinnanngitsumili, kisianni pissutsini marlunni unnerluussutit nakuusernermut tunngassuteqarput, kiisalu pissutsimi ataatsimi sakkortuumik iliuuseqarsimanermut tunngalluni. Tassa pissutsit katillugit sisamat unnerluutigineqartut allagaatinik takunniffigisinnaasami atuarneqarsinnaavoq.
Arnaq Tasiilami imerniartarfiup eqqaani persuttaasimasutut kiisalu angummik kapisilluni toqutseriarsimasutut ilaatigut unnerluutigineqarpoq.
Allagaatinilli takunniffigisami toqutseriarnera iluatsissimanngitsoq atuarneqarsinnaavoq, angummik pakkersimaarinnissimavoq, matullu tunuanut toqqorsimalluni, sumiiffimmiillu assaqqumigut sisamanik kapineqarluni puaminillu pullaarsimalluni qimaasimalluni.
Nakuusernermut unnerluussutip aappaani arnap arnaq alla qasseriarnera ilisimaneqanngitsumik niaquatigut annersittarsimavaa.
Unnerluussisussaatitaasut suliami ajugaassagunik arnaq nammineq angerlarsimaffimmini najugaqarluni pinerluttunik isumaginnittoqarfimmit ukiuni pingasuni nakkutigineqartussanngortinneqassaaq.
