Angutit pingasut eqqartuunneqartut: 29-nik ukiulik paarineqartussanngortinneqartoq
Angutit pingasut 28-nik, 29-nik 31-nillu ukiullit ilaatigut peqqarniitsumik nakuusersimasutut toqutseriarsimasutullu unnerluutigineqarnerannik suliaq ullumi naammassineqarpoq, taakkulu ataatsimut pissutsini 21-ni eqqartuunneqarput.
- Suliaq piffissami sivisuumi suliarineqarsimavoq, ullunilu arlalinni suliarineqarnera sakkortuvoq, pissutsimmi ilungersunarluinnartut pineqarput, Signe Suhr oqarpoq.
Taamaammat suliap naammassinera eqqartuussivimmi suliaqarnermi piumasariuakkamisulli inerneqapajaartoq naammagisimaarluarpaa.
- Eqqartuussisoqarfik Sermersuup suliamik unnerluutiginninnittulli naliliinera maluginiarsinnaavara, taanna oqarpoq.
Eqqartuussivillu unnerluussisussaatitaasup piumasaqaataanit pissutsini minnerusuni allaanerulaartumik naliliivoq.
Tigummigallarneqaannassasoq
Unnerluussisussaatitaasup angut 29-nik ukiulik paarineqartussanngortinneqassasoq piumasaraa, eqqartuussiviullu tamanna aalajangerpaa. Tassa imaappoq, piffissami killiligaanngitsumik eqqartuunneqarpoq.
- Siorna apriilimi toqutseriarsimasutut 2023-milu septembarimi peqqarniitsumik nakuusersisimasutut eqqartuunneqarnera ilaatigut pissutaavoq, Signe Suhr oqarpoq.
Angutilli illersuussisunilu eqqartuussut Nunatta Eqqartuussisuuneqarfianut suliassanngorteqqinniarlugu aalajangerpaat, taannali suliassanngortitseqqinnerup eqqartuussivimmi suliarineqarnissaata tungaanut tigummigallarneqaannassaaq.
Eqqartuunneqaraluarni iperagaasoq
28-nik ukiulimmut eqqartuussut allaaneruvoq, taanna ukiumi ataatsimi qaammatinilu arfinilinni pineqaatissinneqarsimasunut inissiisarfimmiittussanngortinneqarpoq, ullumi eqqartuussiviup naammassinerani iperagaavoq.
Angutit qaammatini arfineq-pingasuni tigummigallarneqarsimavoq, maannali iperagaaqqippoq. Angutip pineqaatissiissummit qaammatit qulit amigaatigai, taakku piffissami kingusinnerusumi pineqaatissiissutigineqassapput. Taannali qaammatit sisamat qaangiuppata misiliutaasumik iperagaanissamik qinnuteqarsinnaavoq.
Suliami eqqartuunenqartoq kingulleq tassaavoq angut 31-nik ukiulik, taanna ilaatigut peqqarniitsumik nakuuseqataasimasutut eqqartuunneqarpoq. Angut qaammatini sisamani pineqaatissinneqarsimasunut inissiisarfimmiittussanngortinneqarpoq.
- Angut maanna taama eqqartuunneqarpoq, pissutigalugu pissutsit eqqartuussissutaasut siusinnerusumi suliarineqartussaagaluarmata, Signe Suhr oqarpoq.
Angutip 31-nik ukiullip eqqartuussut Nunatta Eqqartuussisuuneqarfianut aamma ingerlateqqitassanngortippaa, sulialli qaqugu Nunatta Eqqartuussisuuneqarfiani suliarineqarnissaa oqaatigissallugu siusippallaarpoq.