Angut toqutseriarsimasutut piffissami killiligaanngitsumik tigummineqartussanngortinneqartoq

Marsip qaammataani savimmik saassussineq angutip 58-inik ukiullip piffissami killiligaanngitsumi tigummineqartussanngortinneqarneranik pineqaatissiissutaavoq.

Angut Eqqartuussisoqarfik Sermersuumit toqutseriarsimasutut pisuutinneqarluni ullaaq manna eqqartuunneqarpoq.

- Unnerluutigineqartoq unnerluussissutaasumi pisuutinneqarpoq, eqqartuussiviullu unnerluussisussaatitaasut piffissami killiligaanngitsumi tigumminnittussanngortitsinissamut piumasaqaateqarnerat malippaa. Nunatsinni pineqaatissiissutaasinnaasumi tamanna sakkortunerpaavoq, Kalaallit Nunaanni Politiinit unnerluussisussaatitaasoq, Alexander Stürup suliami unnerluussisuusoq oqarpoq.

- Eqqartuussiviup suliami unnerluussisussaatitaasutulli naliliinera ilorrisimaarutigilluinnarpara. Ilaatigut peqqarniitsumik nakuusertoqaannarani toqutseriartoqarnera pineqarmat, eqqartuussivillu aamma isumaqarpoq maanna eqqartuunneqartoq inuiaqatigiinnut navianaateqarmat tigumminnittussanngortitsinissaq pisariaqartoq, taanna oqarpoq.

Unnerluutigineqartup illersuisuatalu eqqartuussutip suliarineqartussanngorteqqinneqarnissaa erngertumik aalajangerpaat, taamaammat suliaq Nunatta Eqqartuussisuuneqarfiani ingerlateqqinneqassaaq.

Naak suliamik suliareqqitassanngortitsigaluarluni eqqartuussivimmi suliap Nunatta Eqqartuussisuuneqarfiani suliarineqarnissaata tungaanut angut iperagaaqqassanngilaq. Unnerluutigineqartoq maannamut tigummigallagaasimanermisulli tigummigallagaaginnassaaq.

Toqutseriarnerit allat pingasut

Unnerluussisup oqarnera naapertorlugu eqqartuussiviup unnerluutigineqartup toqutsinissaminik siunertaqarsimanera pingaartuutippaa.

Tamanna angutip pinerlineqartumut arlaleriarluni kapisisimaneranik kiisalu suliamik ilisimannittutut nassuiaateqartut nassuiaanerminni ajornerusoqannginnissaanut namminneq unitsisuusimaneraanerannik pissuteqarpoq.

Pinerluuteqartoq uninnissaminik siunertaqanngilaq.

Tamatuma saniatigut aatsaat siullermeerluni toqutseriaraluanngilaq.

- Pinerluuteqartoq inunnut ulorianaateqartumik 1985-imili pinerluuteqartalersimasoq pineqarpoq, taanna ukiut kingulliit 21-t ingerlaneranni pingasunut allanut toqutseriaraluarsimavoq, taamaattumik taassuma iperagaaqqanerani inuiaqatigiit aarlerinartorsiortinneqarnerat unitsissallugu pissusissamisoorpoq, unnerluussisoq oqarpoq.

Saassussinermut pissutaasoq

Pinerlineqartup illoqarfimmi oqaluuserinerlussimagaani taassuminngalu atornerlunneqartutut misigisimalluni unnerluutigineqartup eqqartuussivimmi nammineq nassuiaatigaa. Taamaattumik tassunga saassussinissani aqagumulli unnuttoq, tassa ullormut saassussiffiusumut ukioq manna marsip 24-anut pilersaarusiulersimavaa, pinerluuteqartup pinerlineqartoq ujartorsimavaa, nassaarigamiullu takunnittunit unitsinneqannginnermini qitiatigut sisamariarlugu kapisimavaa.

- Taamaattumik unnerluussisussaatitaasut saassunneq una kingunissaanik eqqasuuteqarani saassussineruvoq, pissutigalugu tamanna unnerluutigineqartumik piareersarneqarmat, Alexander Stürup oqarpoq.

Eqqartuussivimmi suliap qaqugu Nunatta Eqqartuussisuuneqarfiatigoortinneqarnissaa suli ullulerneqanngilaq.