Toqutseriaraluarneq pillugu eqqartuussinissaq kinguartinneqartoq
Toqutseriaraluarnermut unnerluussissut Nuummi Eqqartuussiveqarfik Sermersuumi ippassaq ingerlanneqartussaagaluarpoq tallimanngorpamulli kinguartinneqarluni.
Tasiilami mittarfiup sermernarnera tamatumunnga pissutaavoq, taamaalilluni ilaatigut unnerluussusoq illoqarfimmut pinerlineqarsimasup sumiiffigisaanut tikissinnaasimanani.
Unnerluunneqartup issiavianiippoq angut 58-inik ukiulik unnerluussutip allassimaffia naapertorlugu arnamik tunuatigut savimmik kapisisimasoq.
Kapisinerit ilaat ataaseq atisat qaleriit tamaasa pitarlugit pinerlineqartup tunuanut kappussimavoq. Unnerluutigineqartoq takunnittunit arlalinnit unitsinneqannginnermini sisamariarluni kapiseriarpoq.
Pisoq siorna marsimi pivoq, taamanimiillu angut politiinit tigummineqarsimalluni. Nuummi massakkut pinerluuteqarsimasunut inissiisarfimmiippoq.
Sisamassaa toqutseriaraluartoq
Angutip aalajangersimasumik piffissaligaanngitsumik parnaarunneqartussanngorlugu pinerlineqartumullu 10.000 koruuninik taarsiisussanngorlugu eqqartuunneqarnissaa unnerluussisussaatitaasunit anguniarneqarpoq.
- Unnerluussisussaatitaasut aalajangersimasumik piffissaligaanngitsumik parnaarunneqarnissaanik anguniagaqarnerannut pinerluttup inuttut pissusaanut tunngassuteqarpoq, kisiannili aamma angutip inuttut atugaanut tunngassuteqarluni.
- Sisamassaa toqutseriaraluarpoq, taamaammallu eqqarsartaatsikkut misissuinermit nalunaarut aamma nakorsat eqqartuussinermi siunersiorneqartartut oqaatigaat, inunnut allanut navianaateqartoq, parnaarussinerlu periarfissaasoq, unnerluussisussaatitaasunillu tamanna piumasaraarput, Kalaallit Nunaanni Politiini immikkut unnerluussisoq Alexander Stürup oqarpoq.
Unnerluunneqartoq pinerlineqartorlu imminnut ilisarisimasut unnerluussisoq ilisimatitsivoq, unnerluutigineqartulli sooq saassussisimanera pillugu oqaaseqarsinnaanani. Tamanna eqqartuussineq aallartippat qulaajarneqartussaavoq.
Tasiilami sila pissutigalugu eqqartuussinerup tallimanngorpat ilumut ingerlanneqassanersoq unnerluussisup nalornissutigaa. Massakkumulli tallimanngorpamut kinguartinneqarpoq.