Angut sikukkut nakkarluni ajunaartoq
Uummannami tasermi inummik toqungasumik politiit sapaammmi siumorsipput. Angut pineqartoq sikukkut nakkarnermi kingorna ipisimasoq, Kalaallit Nunaanni Politiini pigaartut pisortaat Malik Olesen ilisimatitsivoq.
Ipilluni ajunaartoqarsimaneranik nalunaarummik politiit sapaammi nalunaaqutaq qulit missaanni tigusaqarput, sumiiffimmilu politiit angutip timaa kinguninngua nassaaralugu. Sikumi tumit putorlu angutip sikukkut nakkarfigisimagunagaa takusinnaasimavaat, pigaartut pisortaat ilisimatitsivoq.
- Sumiiffimmi misissuinermut atatillugu inuup timaa toqungasoq nassaarineqarpoq qaqinneqarlunilu, ullumilu toqusumik misissuisoqassaaq susoqarsimaneranik paasisaqarnerunissatsinnut atugassatsinnik, Malik Olesen oqarpoq.
Tammarnermut immaqa attuumassuteqartoq
Nalunaarut politiinit tiguneqarsimasoq angummut Uummannarmiumut 30-kkunnik ukiulimmut tallimanngormalli takuneqarsimasumut tunngassuteqarpoq. Politiit takkummata inuup timaa toqungasoq tatsimi nassaaraat, kisianni angutip tammaaneqartup tasermilu inuup timaa toqungasoq imminnut attuumassuteqarnersut politiit suli naluaat.
- Toqungasumik misissuinerut tamassuminnga ersarissaaqataassaaq. Suliami susoqarsimanera toqusullu suna toqqutigisimaneraa pillugit paasisaqarnerutissavaatigut, Malik Olesen oqarpoq.
Pigaartut pisortaat oqaluttuarpoq paasissutissat massakkut killeqartut. Toqusumik misissuinerup naammassinissaa utaqqimaarpaa pitinnagulu oqaaseqarnerusinnaanani.
Politiit tatsini ukiup taamaalinerani mianersoqqissaarluni pisuttarnissaq innersuussutigaa siku suli issutsivissimanngimmat.
Angut tallimanngormat kingullermik takuneqartoq inuullu timaa tasermi nassaarineqartoq pillugit suliat ataqatigiittut politiit ualeq manna nalunaaqutaq pingasunut paasissutissiissutigaat.
- Angut maqaasineqartutut tallimanngormat nalunaarutigineqartoq Uummannaminngaanneersuuvoq 29-nik ukiulik, taannaavorlu tasermi nassaarisarput. Toqungasup timaanik ullup qeqqata siornani misissuinerup pinerluttoqarsimanngitsoq paasinarsisippaa, politiini ualikkut pigaartut pisortaat Gedion Quist oqarpoq.
Angutip timaa ilaqutaasunut maanna tunniunneqareerpoq. Politiit pisumik suli misissuipput, annerusumilli maanna oqaaseqarumanngillat.
