Angut Nanortalimmi arnamik toqutsisimasutut pasisaalluni tigusaasoq
![](/sites/default/files/styles/image_934x467/public/2023-11/7V9A0176.jpg?itok=ZmZTpKtz)
Nanortalimmi arnaq 65-inik ukiulik toqungasoq sapaammi nassaarineqarpoq.
Tamanna politiinut sapaammi ullaap tungaani qulinngulertoq siarngutigineqarpoq, politiillu pasinartumik toqusoqarsimaneranik pasilliuteqarput.
Kalaallit Nunaanni politiit tusagassiorfinnut taama nalunaarput.
Politiit taamaasillutik toqutsisoqarsimaneranik suliamik aallartitsipput, tamatumunngalu atatillugu angut 27-nik ukiulik Nanortalimmi sapaammi tigusaraat.
Angut taanna toqutsisimasutut pasisaalluni eqqartuussivimmi ullumi nalunaaqutaq ullup-qeqqanut sassartinneqassaaq.
Pisumut ilisimannittut Kalaallit Nunanni politiinut attaveqaqquneqarput. Suliamut tassunga tunngasumik arlaatigut ilisimannikkuit politiit 701448-mut sianerfigalugit attavigisinnaavaatit.
Annertuumik pinerluttoqarsimatillugu misissueqqissaartartut National Kriminalteknisk Centerimeersut nakorsarlu toqusut timaannik misissuisartoq politiit misissuinerannut ikiuukkiartorlutik Danmarkimiit tikissapput.
Kommune Kujallermi ataatsimiititaliat ilaat politiillu alianartumik pisoqarneranut tunngatillugu nalaatsinerluttunik ikiuinasuarnissamut suleqatigiipput. Oqaloqateqarnissamik pisariaqartitsisut Nanortalimmi ilaqutariinnik sullissivimmut saaffiginnissinnaapput.