Angut nakuusersimasutut pinngitsaaliisimasutullu eqqartuunneqartoq
Nakuuserneq pinngitsaaliillunilu atoqatiginninneq pillugit suliaq Eqqartuussisoqarfik Sermersuumi suliarineqarpoq.
Suliaq sapaatip akunnerata siuliani – tassa maajip 23-ani – aallartinneqarpoq, suliamilu aatsaat maajip 29-ani pingasunngornermi eqqartuussuteqartoqarluni.
Pinerliisoq unnerluutiginnissummi pissutsit peqqarniitsut marluk nakuusernermut pinngitsaaliillunilu atoqatiginninnermut tunngasut pillugit eqqartuunneqarpoq. Politiit suliami unnerluusisussaatitaasuat KNR-imut allakkatigut akissuteqarluni paasissutissiivoq.
- Unnerluutigineqartoq pissutsini peqqarniinnerpaani marlunni siorasaarinertalimmik, toqqusassiinertalimmik kiisalu savilersornertalimmik pinngitsaaliilluni atoqatiginnissimasutut kiisalu allamik peqqarniitsumik nakuusersimanermut pisuutinneqarluni eqqartuunneqarpoq. Angut ukiuni marlunni pineqaatissinneqarsimasunut inissiisarfimmiittussanngortinneqarpoq, Kalaallit Nunaanni Politiit unnerluusisussaatitaasuat allappoq.
Angutip 36-nik ukiullip arnaq savimmik siorasaarpaa, pinngitsaaliillunilu atoqatiginninnermini ‘nillianak, taamaanngippat toqussavakkit’, aamma ‘aaooannut oqaruit aallaassavara’ oqaatigisimagai, unnerluussissummi allassimavoq.
Nunatta Eqqartuussisuuneqarfianut suliarineqartussanngortikkaa
Angutip maanna eqqartuunneqarsimasup eqqartuussissuserinermi illersuisuata ukiuni marlunni pineqaatissinneqarsimasunut inissiisarfimmiittussanngortitsineq ingerlaannartumik suliarineqaqqittussanngortippaa. Taamaammat eqqartuussivimmi suliaq Nunatta Eqqartuussisuuneqarfianut ingerlateqqinneqassaaq, suliareqqiinissap suli ullulerneqanngitsup pinissaata tungaanut – angut politiinit tigummigallarneqassaaq, unnerluusisussaatitaasoq allakkatigut akissummi allappoq.
- Eqqartuussiveqarfiup unnerluusisussaatitaasut pissutsini pingaarnerni (pissutsit marluk angummut eqqartuussutigineqartuni aaqq.) pisuunermut apeqqummut isumaqarneratulli isumaqarnera naammagisimaarpara, suliarlu nunatta eqqartuussisuuneqarfiani maanna suliarineqartussanngorpoq, unnerluussisoq allapoq.
Pissutsit marluk nakuusernermut pinngitsaaliillunilu atoqatiginninnermut tunngasut saniatigut angut qarasaasianut tunngasutigut peqquserlussimasutut pissutsinilu marlunni aserorterisimasutut aamma unnerluutigineqarpoq.