Angut mianersuaalliorluni toqutsisutut imigassartorsimallunilu biilersimasutut unnerluutigineqartoq
Arnap angummit 41-nik ukiulimmit aqquserngit naapiffianni, tunuarsimasussaatitaanerminik malinninngitsumit aporneqarnermi kingorna aqqunartiterneqarnini toqqutigai.
Angut ataasinngorpat eqqartuussivimmi sassartinneqassaaq, tassanilu ajutoornermut atatillugu mianersuaalliorluni toqutsitut unnerluutigineqassaaq, unnerluussissulli aamma naapertorlugu imigassartorsimalluni biilerneq tillittoqarneranillu ilumuunngitsumik nalunaarutiginninneq ajutoornermut arnap toquneranik kinguneqartumut attuumassuteqanngitsoq aamma unnerluutigineqassapput.
Unnerluussissut naapertorlugu angut 2020-mi upernaakkut imigassartorsimatilluni arlaleriarluni biilersimasoq allassimavoq.
Biilimik ”tillitamik” ajutoorneq allanik ilaqanngitsoq
2020-mi apriilip naanerani unnerluutigineqartup biili tillinneqarsimasoq nalunaarutigaa, naak unnerluussissut naapertorlugu angut ullormi tassani nammineerluni biilimik ingerlatsilluni kussinermut nammineq nakkarsimagaluarluni.
Taamaammat tillittoqarneranik ilumuunngitsumik nalunaarutiginninnermik aamma unnerluutigineqassaaq.
Angutip kukkunermut nakkarneranut atatillugu imigassartorsimanera uuttorneqarpoq, tassanilu imigassap promillia 2 procentiusoq paasineqarluni.
Ullut marluk qaangiutiinnartut angut unnerluussissut naapertorlugu aamma aalakoorluni biileqqissimavoq, tassanilu imigassap promillia 2,3 procentiusoq paasineqarpoq.
Biilersinnaanermut allagartaajarneqassasoq
Unnerluussisussaatitaasut angut ukiuni qulini biileqqusaajunnaartinneqassasoq kiisalu pinerluuteqaqqissaguni ulluni 30-ni pineqaatissinneqarsimasunut inissiisarfimmiittussanngortinneqassasoq piumasaqaatigaat.
Eqqartuunneqassaguni angut ukiuni tulliuttuni marlunni inatsimmik unioqqutitseqqissaguni aatsaat pineqaatissinneqarsimasunut inissiisarfimmiittussanngortinneqassaaq. Unnerluussisussaatitaasut angut maannakkut 45.500 koruuninik akiligassinneqarnissaa piumasaraat.
