Nuummi arnaq nivattaassuarnik aporneqarluni ajunaartoq
Nuummi arnap nivattaassuarnik aporneqarnermi kingorna inuunini annaavaa.
Arnaq 60-it sinnerlugit ukiulik, Nuummi najugaqarpoq.
Nivattaassuit Nuummi Svend Jungip Aqqutaani aputaajaallutik arnaq aporpaat.
Kalaallit Nunaanni politiit pigaartuisa, pisortaat Palli Augustinussen taama oqarpoq.
Arnaq Dronning Ingridip napparsimmavissuanukaanneqaraluarpoq annaanneqarsinnaasimanngilarli.
Qanigisaasut ilisimatinneqareerput.
Mianersuaalliorluni toqutsisimasutut unnerluutigineqartoq
Angut 40-nik ukiulik nivattaassuarnik aquttuuvoq. Taanna imigassartorsimanersoq misissorneqarpoq, imigassartorsimaneranilli ersertoqarnani.
Taanna Nuummi politeeqarfimmi killisiorneqarpoq, mianersuaalliorlunilu toqutsisimasutut pasineqarpoq.
Alianartorujussuarmik ajutoortoqarpoq, ajornerpaamillu pisoqarluni, Palli Augustinussen oqarpoq.
- Nivattaassuarnik aquttumut takunnissimasunullu misigisaq qularnanngitsumik sakkortusimassaaq. Taamaammallu takunnissimasunut piumasunut, kommunimi upalungaarsimasut suleqatigalugit ikiuigasuartoqarnissaanik piaartumik pilersitsisoqarpoq.
Iperagaaqqittoq
Angut 40-nik ukiulik nivattaassuarnik aquttuusoq soorunami aamma pisumut sunnerteqqaqisoq, politiit nalunaarutigaat.
- Iluamik sullinneqassaaq. Mianersuaalliorluni toqutsisimasutut pasineqarpoq, taama siunertaqarani angallannermi toqutsisoqarsimatillugu, suleriuseq taanna nalinginnaalluinnarpoq. Angut iperagaaqqippoq, pisumullu politiit misissuissapput, Palli Augustinussen oqarpoq.