Angut kannguttaalliorfiginnissimasutut eqqartuunneqartoq, suliarli immaqa suli naanngilaq

Naqqiineq nal. 12.27: Qulequttap nassuiaataani kukkuneqaraluarami kukkunera naqqinneqarpoq.

Pinngitsaaliinermik, kannguttaalliorfiginninnermik meeqqanillu kinguaassiutimikkut atornerlunneqartunik pigisaqarnermik suliaq pillugu tallimanngormat eqqartuussisoqarpoq.

Suliaq Nuummi Eqqartuussiveqarfik Sermersuumi ingerlanneqarpoq.

Angut 22-nik ukiulik Tasiilameersoq ukiuni marlunni qaammatinilu arfinilinni pinerluuteqarsimasunut inissiisarfimmiittussanngorlugu eqqartuunneqarsimasoq immikkut unnerluussisoq Morten Grimm Hvergel ilisimatitsivoq.

Eqqartuussinerlu tupaallaatigisimallugu oqaluttuarpoq.

- Eqqartuussiviup aalajangiinera tupaallaatigaara, unnerluussutinilu allani pinngitsuutinneqarnera tupaallaatigalugu, oqarpoq.

Unnerluussisussaatitaasut unnerluutigineqartoq ukiuni sisamani pinerluuteqarsimasunut inissiisarfimmiittussanngortinneqarnissaa tunngavilersuutigaat, eqqartuussiviullu aalajangiinera taamaammat tupaallaatigalugu. Unnerluussisussaatitaasut taamaammat sapaatit akunnerini marlunni eqqarsarfissaqarumasimasut, oqaluttuarpoq.

Illersuisup unnerluutigineqartullu aamma tupaallaatigaat.

- Unnerluussissummik qaqitsigaangatta eqqarsaatigilluartarparput, taamaammallu suut unnerluussissutiginerlugit aamma eqqarsaatigisarlutigu. Suliassaraarput unnerluussigaangatta uppernarsaateqarneranik isumaqarnissarput.

- Sapaatit akunnerini marlunni eqqarsarfissaqarumalluta aalajangernitsinnut pissutaavoq suliap Nunatta Eqqartuussisuuneqarfianut ingerlateqqinneqassanersoq nalilersussagatsigu. Eqqartuussivimmilu tusakkakka eqqarsaatigalugit taamaaliornissaq massakkut qaninneruvoq, Morten Grimm Hvergel oqarpoq.

Unnerluussisulli erseqqissaatigaa eqqartuussutip allaganngornera atuarnissaanik periarfissaqalersinnani inaarutaasumik aalajangiinaviarani.

- Qularutissaanngilarli suliaq Nunatta Eqqartuussisuuneqarfianut ingerlateqqinneqassanersoq eqqarsaatigigakku.

Naatsumik oqaluttuaralugu suliaq ilaatigut meeqqamik 12-it inorlugit ukiulimmik pinngitsaaliisimanermut tunngassuteqarpoq. Katillugit pisuni arfineq pingasuni unnerluutigineqarpoq, taakkunannga unnerluussutit arfinillit pinngitsaaliinermut, kannguttaalliorfiginninnermut aamma-imaluunniit meeqqanik kinguaassiuutitigut atornerlunneqartunik pigisaqarnermut tunngassuteqarlutik.

Allagaq unnerluussut naapertorlugu niviarsiaqqanut assigiinngitsunut sisamanut pinerluuteqarnerup nalaani arfineq pingasunit 14-it tikillugit ukiulinnut tunngassuteqarput 2015-imiit 2016-imiilluunniit 2023-mi marsip tungaanut pisimasunik.

Unnerluutigineqartuni arlalinni pinngitsuutinneqartoq

Unnerluussissutini pingasuni pinerlineqartoq ataasiusimasoq unnerluussisoq oqaluttuarpoq.

Unnerluussissutini katillugit arfineq pingasuusuni angut 22-nik ukiulik pisuni marlunni kannguttaalliorfiginnissimasutut eqqartuussivimmit pisuutinneqarpoq. Unnerluussissutit sinnerini pinngitsuutinneqarpoq imaluunniit ilaannakortumik pisuutinneqarluni. Eqqartuussineq taamaammat unnerluussisussaatitaasut piumasaannit sakkukinnerusoq, Morten Grimm Hvergel oqaluttuarpoq.

Taarsiissuteqarnissamik piumasaqarnermi aamma tamanna atuuppoq. Unnerluussisoq tamatumani katillugit 144.000 koruuninik taarsiissuteqartoqarnissaanik piumasaqarsimavoq, kisianni Eqqartuussiveqarfik Sermersooq aalajangersimavoq, eqqartuunneqartoq pinerlineqartunut katillugit 82.000 koruuninik taarsiissuteqassasoq.

Suliaq Nunatta Eqqartuussisuuneqarfianut ingerlateqqinneqassanersoq 13. oktobari aalajangerneqassaaq, sapaatit akunnerini marlunni eqqarsarfissaq qaangiuppat.