Angut meeqqanik pinngitsaaliisarsimasutut eqqartuussivilersuunneqartoq
Suliaq pinngitsaaliinermut meqqanillu atornerluinernik filmiliaateqartumut tunngasoq Eqqartuussisoqarfik Sermersuumi Nuummiittumi ullumi aallartinneqassaaq.
Eqqartuussanngortitaasoq tassaavoq angut 22-nik ukiulik Tasiilameersoq, unnerluussissutigisaq malillugu ilaatigut meeqqanik 12-t inorlugit ukiulinnik pinngitsaaliisarsimasutut pasineqarpoq. Unnerluussissutigisat arfineq-pingasuupput, taakkunannga arfinillit pinngitsaaliisimanernut, kannguttaalluliorfiginninnernut aamma meeqqanik atornerluinernik filmiliaateqarnermut tunngasuullutik.
Atornerlunneqarsimasut sisamaapput
Unnerluussissutigisaq malillugu unnerluussisussaatitaasup piumasaraa angutip niviarsiaqqat sisamat aningaasanik taarsiiffigissagai,katillugit 144.000 koruuninik.
Unnerluussisoq, Morten Grimm Hvergel, oqaatigaa niviarsiaqqat assigiinngitsut sisamaasut. Niviarsiaqqat eqqunngitsuliorfigineqarnermik nalaanni arfineq-pingasut 14-illu akornanni ukioqartut.
22-nik ukiulik siullermik arfineq-pingasunik qulingiluanik ukiulimmut kannguttaatsuliorfinnissimasutut 2015-2016-imi unnerluutigineqaqqaarpoq. Niviarsiaraq taamani itersimavoq angutip nalikkaamigut attuualaaraani.
2020-mi aamma unnerluussissutigisaq malillugu niviarsiaqqamik maanna 17-nik ukioqartumik kannguttaatsuliorfiginnissimavoq.
Niviarsiaraq arlalitsigut eqqunngitsuliorfigaa
Angut siornaak 2021-mi, niviarsiaqqamut taamanikkut 12-nik ukioqartumut, sininnerata nalaani atornerluisimavoq. Pisoq mobiliminik filmiliarisimavaa. Taamaammat meeqqanik atornerlunneqartunik filmiuteqarnermut tunngatillugu unnerluutigineqarportaaq.
Unnerluussissutigisaq malillugu suliassap sinnerani unnerluussutaasut niviarsiaqqamut ataatsimut tunngapput, unnerluussisoq Morten Grimm Hvergel oqaluttuarpoq.
Angut 2022-mi marloriarluni aamma marsimi ukioq manna marloriarluni niviarsiaraq arfineq-pingasunik/qulingiluanik ukiulik atornerluttaarsimavaa.
Unnerluussissutigisaq malillugu eqqunngitsuliortup niviarsiaraq kinguaassiuutaasigut attuualaarsimavaa, pinngitsaalillugu usuni miloqqusimavaa, namminerlu nalikkaavi aluttorsimallugit, pinngitsaalillugulu assai aqullugit tissassartissimalluni.
Morten Grimm Hvergelip naatsorsuutigaa, angutip eqqartuussaanera tallimanngornermi naammassippat pineqaatissiinermik kinguneqassasoq. Unnerluussisussaatitaasut angut niviarsiaqqanut taarsiissutissat 144.000 koruunit saniatigut ukiuni sisamani pineqaatissinneqarsimasunut inissiisarfimmiissasoq piumasaraat.
