Angut Ittoqqortoormiineersoq isaarissamit aallaasimanini pissutigalugu pineqaatissiinngikkallartumik eqqartuunneqartoq
Angut 36-nik ukiulik Ittoqqortoormiineersoq pinerluuteqaqqissaguni ulluni 14-ini pineqaatissinneqarsimasunut inissiisarfimmiittussanngortinneqarluni eqqartuunneqarpoq.
Angut nammineq isaarissamini seqqorsimanini pissutigalugu eqqartuunneqarpoq. Seqqorneq 2022-mi decembarimi pisimasoq, Kalaallit Nunaanni Politiit tusagassiuutinut nalunaarummi allapput.
Politiit oqarnerat naapertorlugu Nunatta Eqqartuussisuuneqarfiani pinerluttulerinermi inatsimmi aalajangersakkamut nutaamut aatsaat siullerpaamik aalajangiivoq. Aalajangersagaq nunatsinni najugaqarfiusuni aallaammik seqqornermut "eqqunngitsuliornerutitsilerpoq" (tassa inatsimmut unioqqutitsinerulersitsivoq.
Inatsimmi aalajangersagaq 2022-mi juulip aallaqqaataaneersuuvoq. Taannalu qoorortuumik, timmiarsiummik, aallaaseeqqamik silaannaap naqitsineranit aallartittartumik imaluunniit illuinnarsiummik najugaqarfiusunit 500 meterimik ungasitsigisup iluanni seqqorneq unioqqutitsinerulersitsisoq, politiit nalunaarput.
- Pinerluttulerinermi inatsimmi aalajangersakkap nutaap illuliorfiusimasuni aallaammik seqqoraanni tamanna ulorianartuusoq taamaammallu pinerluttuliornermi inatsimmut ilaasoq nalunaaqutserpaa, unnerluussisussaatitaasoq, Alexander Stürup oqarpoq.
Imminut illersorluni nanumut aallaaneq
Illuliorfiusimasuni seqqorneq politiit malittarisassaat siusinnerusukkut naleqqussarnikuusimagaluarpoq, tamannalu 3.000 koruuninik taamaallaat akiligassiissutaasarsimalluni.
- Tamanna akiligassiinermut tunngaannarani minnerpaamik pinerluuteqaqqikkaanni pineqaatissinneqarsimasunut inissiisarfimmiittussanngortitsinermik kinguneqarsinnaanera pillugu Nunatta Eqqartuussisuuneqarfiata isumaqatigimmatigut ilorrisimaarutigilluinnarpara, unnerluussisoq oqarpoq.
Politiit eqqarnermi unammisoqarnerani assigisaanilluunniit immikkut ittumik akuersissuteqarsinnaapput. Aamma naak illuliorfiusimasumiikkaluartoq nanoq pillugu imminut illersornermi seqqorneq inatsimmik unioqqutitsinerunavianngilaq.
Illuaqqat ataasiakkaat illuaqqalluunniit mikisut piniariartarfiit aalajangersakkamut aamma ilaatinneqanngitsut politiit tusagassiuutinut nalunaarummi allapput.