Angut imigassartorsimatilluni umiatsiarsimasutut nunatta eqqartuussisuuneqarfiani eqqartuunneqartoq
Angut 62-inik ukiulik Nunatta Eqqartuussisuuneqarfianit imigassartorsimalluni umiatsiamik ingerlatsisimasutut eqqartuunneqarpoq.
Angut pingasunngormat eqqartuunneqarpoq.
Suliaq 2020-mi Kapisillit Festivalertoqarnerani aallartippoq, tassanilu angut 59-inik ukioqartoq nunamit umiatsiaq pullattagaq motoriaqartoq atorlugu umiatsiamut anginerusumukarluni iterlammukarpoq.
Angut 59-inik ukiulik imigassartorsimalluni umiatsiarsimasutut pasivaat, taamaammat unnerluutigaat aaversinneratigullu imigassartorsimanermut promillia 1,77-imiittoq paasineqarpoq.
Siusinnerusukkut promillip annertunerpaaffissaa aalajangersarneqarnikuunngitsoq
Sunngiffimmi umiatsiaararsortartunut isumannaatsumik umiatsiamik ingerlatsisinnaagaanni imigassartorsimatilluni umiatsiarsinnaanermut malittarisassaqarnikuuvoq – tassanili promillimut killiliinertaqarani.
Tamannami 2013-imi oktobarip aallaqqaataani allanngortinneqarnikuuvoq, taamaalilluni biilinik ingerlatsinissamitulli umiatsiarsinnaanissamut promille annerpaamik 0,5-imiittussanngortinneqarluni.
Eqqartuussisoqarfik Sermersuup ukioq manna marsip 29-ani angut siusinnerusukkut aalajangersakkat malillugit eqqartuunnikuuaa akiligassillugulu. Angutilli pinngitsuutinneqarnissani anguniarlugu eqqartuussut nunatta eqqartuussisuuneqarfianut suliassanngorteqqippaa.
Nunatta Eqqartuussisuuneqarfiata angut pinngitsuutinngilaa. Taannami 9.000 koruuninik akiligassinneqarluni pingasunngormat eqqartuunneqartoq, politiit nalunaarutigaat.
Imigassartorsimalluni umiatsiarneq aamma biilinik ingerlatsineq
Politiit oqarnerat naapertorlugu eqqartuussut tunngaviliivoq, pissutigalugu tamanna imigassartorsimatilluni umiatsiarnermut biilinillu ingerlatsinermut naligiissitsinerummat.
Unnerluussisussaatitaasoq, Freja Linddahl Andersen tusagassiuutinut nalunaarummi oqarpoq:
- Naak umiatsiaaraq pullattagaq mikisoq motoriaqqamik motoreqartoq pineqaraluartoq imigassartorsimatilluni biilinik ingerlatsineq umiatsiaaqqamillu ingerlatsineq imminut allanullu navianartorsiortitsinerusoq pineqarpoq. Taamaammat imigassartorsimatilluni biilernermi umiatsiaararnermilu malittarisassat assigiittut atuuttut nunatta eqqartuussisuuneqarfiata isumaqatigimmatigut ilorrimaarluinnarpunga.