Aalakoorluni umiatsiarneq: 30-nik ukiulik mianersuaalliorluni toqutsisutut pineqaatissinneqartoq

Ukiut marluk matuma siorna Nuummi umiatsiaq kassumut apormat arnaq 26-nik ukiulik ajunaarpoq.

Umiatsiami ilaasoq alla ajoqusingaatsiarpoq.

Nunatsinni Eqqartuussisuuneqarfiup eqqartuussut maanna suliarereerpaa, angullu 30-nik ukiulik Nuummeersoq mianersuaalliorluni toqutsisimasutut qaammatini arfineq pingasuni piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq.

Ajutoorneq 2020-mi juulip ulluisa 19-ianni pivoq. Angallammi inuit arfineq-marluk Nuummiit Nuup Kangerluanut ilaasuupput. Angallammik aquttoq 40-50 knobimik sukkassuseqarluni kassumut aporiataarpoq.

Inuusuttut umiatsiamiittut 20-t 30-llu akornanni ukioqarput. Ilaasut umiatsiap qaaniittut imaanut igeriunneqarput – taakkulu ilaat arnaq ajunaarluni.

Ilaasoq alla aamma ajoqusingaatsiarpoq. Politiit oqarnerat naapertorlugu taassuma singernera napivoq kanaavalu nallorneqarluni.

Eqqartuussiveqarfiup eqqartuussutaa sukannernerusoq

Eqqartuussivimmi suliaq Eqqartuussiveqarfik Sermersuumi suliarineqarmat angut 30-nik ukiulik ilaatigut mianersuaalliorluni toqutsisutut, mianersuaalliornikkut timikkut ajoqusiisimasutut navialititsisimasutullu eqqartuunneqarpoq. Angullu ukiumi ataatsimi qaammatinilu aqqanilinni pineqaatissinneqarsimasunut inissiisarfimmiittussanngortinneqarluni.

Eqqartuussut nunatta eqqartuussisuuneqarfianut suliareqqitassanngortinneqarpoq – maannalu 30-nik ukiulik mianersuaalliorluni toqutsisutut mianersuaalliornikkullu timikkut ajoqusiisutut eqqartuunneqarluni. Taannalu qaammatini arfineq pingasuni pineqaatissinneqarsimasunut inissiisarfimmiittussanngortinneqarpoq.

AAMMA ATUARUK Aalakoorluni umiatsiartoq mianersuaalliorluni toqutsisimasutut pineqaatissinneqartoq

Taamaakkaluartorli unnerluussisussaatitaasup, Gutti Harrysonip piumasaqaatitanngitsumik pineqaatissiineq iluarisimaarpaa:

- Angut 30-nik ukiulik umiatsiap apornerata nalaani aquttuusimanersoq unnerluussisussaatitaasut uppernarsarsinnaaneraat eqqartuussiveqarfimmi nunattalu eqqartuussisuuneqarfiani sammineqangaatsiarpoq. Tamatumanilli nunatta eqqartuussisuuneqarfiata eqqartuussiveqarfik unnerluussisussaatitaasullu isumaqatigai tamannalu ilorrisimaarutigilluinnarpara, Gutti Harryson oqarpoq.

- Eqqartuussut tunngaviusumik pingaaruteqarpoq, pissutigalugu nunatsinni eqqartuussiveqarfiit suliamik assingusumik suliaqarnikuunngillat. Naallu nunatta eqqartuussisuuneqarfia pineqaatissiissutip sivisussusaanik appaagaluartoq qaammatinik arlalinnik piumasaqaatitanngitsumik pineqaatissiineq eqqartuussiviup mianersuaalliorluni imaatigut angallannernik ilungersunarluinnartuutitsineranut takussutissiivoq.