Aalakoorluni umiatsiartoq mianersuaalliorluni toqutsisimasutut pineqaatissinneqartoq
Angut 30-nik ukiulik imigassartorsimasutut mianersuaalliorsimasutullu ukioq ataatsimik qaammatinilu aqqanilinnik pineqaatissinneqarsimasunut inissiisarfimmiittussanngortinneqarpoq.
Kalaallit Nunaanni politiit taama nalunaaruteqarput.
Angut 2020-mi juulip 19-iata unnuaani kassumut apornerani, arnaq 26-nik ukiulik ajunaarpoq.
Tamanna Nuup Kangerluani Sermitsiap eqqaani pivoq.
Ajutoornerup nalaani angut aalakoornartutorsimavoq, taannalu Sermersuup eqqartuussiviani ullumi mianersuaalliorsimasutut eqqartuunneqarpoq.
Angallammi inuit arfineq marluk Nuummiit ilaasuupput. Angut 30-nik ukiulik angallammik 40- 50 knobimik sukkassuseqarluni kassumut aporpoq. Ilaasut arlaqartut imaanut igeriussaapput, arnarlu 26-inik ukiulik ajunaarluni.
Angut alla aamma eqqartuunneqarpoq
Angut 30-nikukiulik inunnut allanut mianersuaalliorluni toqutsisimasutut, mianersuaalliortutut timikkut ajoqusiisimasutut sakkortuumillu ulorianartorsiortitsisimasutut ullumi Sermersuup Eqqartuussiviani eqqaartuunneqarnera naammassineqarpoq. Taanna aamma imarsiornermi inatsimmik unioqqutitsisimasutut pisuutinneqartoq, Kalaallit Nunaanni politiit ilisimatitsipput.
Angut alla 29-nik ukiulik aalakoorluni umiartsiarsimasutut imarsiornermilu inatsimmik unioqqutitsisimasutut akiliisitaasussanngortitaavoq. Taanna Nuummiit Nuup Kangerluanukarnermini aquttooqqaaraluarpoq, kingornalu aquut 30-nik ukiulimmut tunniuppaa, ajutoorlutillu.
Eqqartuussut suliareqqitassarngortinneqartoq
Aalakoorluni umiartornermut pineqaatissiissutip saniatigut 29-nik ukiulik arlaleriarluni nakuusersimasutut pineqaatissinneqarsimasunut qaammatini sisamani inissiisarfimmiittussatut eqqartuunneqartoq, politiit paasissutissiipput.
- Kina umiatsiap apornerani aquttuunersoq unnerluussisussaatitaasunit uppernarsisinneqarsinnaanersoq suliami apeqqutini annersaavoq. Unnerluussisussaatitaasulli Angutip 30-nik ukiullip aquttuuneranik oqarnerat eqqartuussisoqarfimmit isumaqatigineqarmat, angut pisuutinneqarpoq, unnerluussisussaatitaasoq Gutti Harryson oqarpoq.
Unnerluutigineqartup illersuisuata eqqartuussut suliareqqitassanngortippaa. Suliaq Kalaallit Nunaata Eqqartuussisuuneqarfianit maanna suliarineqartussanngorpoq.