Angut illumut iseriarluni arnamut sinittumut nuluisigut attuuannissimasutut eqqartuunneqartoq
Angut 26-nik ukiulik Paamiuni Eqqartuussiveqarfik Sermersuumi tallimanngornermi unnerluutigineqarpoq.
Taanna pissutsini aqqaneq-marlunni, matumani kannguttaatsuliornermut, illumi eqqissiviilliortitsisimasutut tillinniarnernilu unnerluutigineqarpoq.
Angut pissutsini katillugit arfineq-pingasuni eqqartuunneqarpoq.
Angut Paamiuni najukkamut 2015-imi iseriarluni arnamut 41-nik ukiulimmut sinittumut nuluisigut attuuannissimasutut ilaatigut pisuutinneqarluni eqqartuunneqarpoq.
Tamatuma pinissaanut ullualuit sioqqullugit Paamiuni najukkamut allamut aamma isersimavoq. Angullu illumi najugaqartumut, niviarsiaqqamut 14-inik ukiulimmut kannguttaatsulioriarsimasutut unnerluutigineqarnermini pinngitsuutinneqarpoq.
Unnerluussissut naapertorlugu niviarsiaraq sinittoq uluaasigut tagiarsimavaa, tamannali eqqartuussivimmi ilisimannittup nassuiaatigineqarnerani tunngavilerneqanngilaq.
Kalaallit Nunaanni Politiit KNR-imut paasissutissiipput.
Angut tamatuma saniatigut arnamut 2020-mut kannguttaatsuliorsimasutut unnerluutigineqarnermi aamma pinngitsuutinneqarpoq.
Tillinniarneq biilinillu tillinneq
26-nik ukiulik tillinniarnerni pissutsini assigiinngitsuni marlunni pisuutinneqarpoq.
Unnerluussissut naapertorlugu taakku tamarmik 2017-imi upernaakkut allanik peqateqarnermi tillinniarnerupput.
Siullermi Paamiuni pisiniarfeeraq Mikeeraq tillinniarfigineqarpoq, angutip igalaaq aserorlugu cigarettit 2.500 koruunit nalinginut tillippai.
Aappaa Paamiuni Royal Greenlandip tunitsivianut tillinniarneruvoq, angutip matu aseroriarlugu qerisut 3.225,57 koruuninik naleqartut tillissimavai.
Angut tamatuma saniatigut inuk alla peqatigalugu biilimik tillissimapput, naallu biilernermut allagartaqanngikkaluarluni ingerlaassutigisimallugu.
Unnerluussisussaatitaasut nunatsinni tarnikkut napparsimasunut immikkoortortaqarfimmi katsorsartittoqarnissaa piumasarisimavaat, eqqartuussiviulli suliap suliarineqarnera sivisuallaaqimmat pineqaatissiissuteqartoqassanngitsoq aalajangerpaa.
Angulli arnamut kannguttaatsuliorsimanermut 5.000 koruuninik taarsiissuteqartussanngortinneqarpoq.
Kalaallit Nunaanni Politiit eqqartuussivimmi suliaq Nunatta Eqqartuussisuuneqarfianut ingerlateqqissinnaassanerlugu eqqartuussut tusaatissatut tiguaat.
