Angut – ilaatigut meeqqamut ataatsimik ukiulimmut pinngitsaaliinerit pillugit eqqartuunneqartoq

Eqqartuussisoqarfik Qeqqatap Sisimiuni eqqartuussivimmi suliaq ’nalinginnaanngitsoq’ ippassaq eqqartuussutigaa, tassanilu meeqqanik 12-inik 15-inillu ukiulinnik atornerluineq sammineqarpoq.

Angut 20-nik ukiulik meeqqanik pingasunik ataatsimit 14-inut ukiulinnik atoqateqarsimasutut pasineqarluni unnerluutigineqartuuvoq.

- Suliaq nalinginnaanngilaq. Meeqqanik mikisunik naapertuilluanngitsuliornerit naammattoorneqartarnerat qaqutigoorpoq, eqqartuussivimmi suliami unnerluussisussaatitaasoq, Gutti Harryson oqarpoq.

Naapertuilluanngitsuliornerit unnerluussissut naapertorlugu 2021-mi januaarip naaneranit 2022-mi oktobarip akornanni pipput.

Katsorsarneqartussanngortinneqarluni eqqartuunneqartoq

Angut Danmarkimi tarnikkut napparsimasunut napparsimmavimmi katsorsarneqartussanngortillugu eqqartuussivimmi eqqartuunneqarpoq.

- Suliaq sutigut tamatigut tataannaqaaq. Taamaammat eqqartuussisoqarfiup unnerluussisussaatitaasutulli naliliilluni taama pisoqaqqinnginnissaa qulakkeerniarlugu tarnikkut napparsimasutut katsorsarneqartussanngortitsinera ilorrisimaarutigaa.

- Eqqartuussisut unnerluussisussaatitaasunit piumasaqaatigisatsinnut naapertuuppoq, aamma nakorsat eqqartuussinermi siunersiortagaasartut tarnikkut misissuineq tunngavigalugu innersuussuteqarneranut naapertuuppoq, Gutti Harryson oqarpoq.

Kannguttaatsuliorfiginninneq

Meeqqamut ataatsimik ukiulimmut naapertuilluanngitsuliorneq siorna oktobarimi pivoq. Angut tamatuma saniatigut unnummi tassani niviarsiaqqamut sisamanik ukiulimmut, iluatigut atisaanik ammoortitsisimanini pissutigalugu kannguttaatsuliorsimasutut aamma eqqartuunneqarpoq.

- Meeqqamut ataatsimik ukiulimmut atornerluisimasutut sisamanillu ukiulimmut kannguttaatsuliorsimasutut pinngitsuunerarpoq, pissutsilli allat nassuerutigai, Gutti Harryson oqarpoq.

Meeqqamik ataatsimik ukiulimmik pinngitsaaliilluni atoqateqarsimasutut eqqartuunneqarnermi saniatigut 2021-mi januaarimi ullormi ataatsimi 13-inik ukiulimmik pingasunit ikinnerunngitsunik atoqateqarsimasutut eqqartuunneqarpoq. Qaammatillu qulit qaangiuttut 14-inik ukiulimmik atoqateqarsimasutut aamma eqqartuunneqarluni.

Unnerluussissut naapertorlugu eqqartuunneqartup inuusuttuaqqat 15-it inorlugit ukioqartut ilisimaarisimavaa, taamaammallu ’mianersuaalliortumik iliuuseqarsimalluni’.

Peqqarniitsumik atornerluineq pillugu taarsigassinneqartoq

Unnerluussisussaatitaasut pinerliffigineqartup sisamat sinnerlugit ataatsimut 135.000 koruuninik taarsigassiisoqarnissaa Danmarkimilu tarnikkut napparsimasutut inissiisoqarnissaa piumasaraat.

Eqqartuusiviulli meeqqamut ataatsimik ukiulimmut naapertuilluanngitsuliorneq ’immikkut peqqarniilluinnarnera’ pissutigalugu taanna mitagaaneq pillugu 150.000 koruuninik taarsiissuteqarfigineqassasoq, sisamanillu ukiulik 15.000 koruuninik taarsiiffigineqassasoq aalajangerpaa. Inuusuttuaqqat marluk taarsiiffigineqanngillat, unnerluussisoq oqarpoq.

Aammattaaq eqqartuunneqartoq Danmarkimi tarnikkut napparsimasunut napparsimavimmi piffissami killiligaanngitsumi katsorsarneqartussanngortinneqarluni eqqartuunneqarpoq.

- Inissiisarfimmiittussanngortitsisoqarani katsorsaasoqarnissaanut eqqartuussuteqartoqarsimagaangat tamanna isumaqarpoq nakorsat katsorsarneqartoq piareersimasutut isigileraangamikku aniguisissinnaagaat. Tamannali aamma eqqartuussutip piffissaligaannginneranik aamma isumaqarpoq, unnerluussisoq oqarpoq.

Angut siorna oktobarimi naapertuilluanngitsuliornermi kingornali Danmarkimi tarnikkut napparsimasunut napparsimmavimmi tigummigallarneqalerpoq, tassanilu aamma katsorsarneqassasoq, unnerluussisoq oqarpoq.