Angut 28-nik ukiulik muslimit qinusarfianni toqoraasimasutut pasineqartoq pinngitsuunerartoq
Eqqartuussivimmut nunatta nalunaaqutaa naapertorlugu unnuaq sassartinneqarami taama oqarpoq. Nutaarsiassaqartitsivik AP taama allaaserisaqarpoq.
Tarrant, 28-nik ukiulik, Aucklandimi parnaarussivimmi immikkut isumannaalisakkami maanna tigummineqarallarpoq, tamannalu pillugu eqqartuussivimmut sassartinneqarnerminut atatillugu videokkut attaveqaatikkut sassartinneqarluni.
AAMMA ATUARUK New Zealandimi toqoraasoq peqqarniisaarniarsimasutut aamma unnerluutigineqartoq
Saassussinermi aniguisut, toqutaasunullu qanigisaasut 80-init amerlanerusut, eqqartuussivimmi najuupput.
Tarrant, inunnik 51-inik toqutsisimasutut pasineqarpoq, inunnillu allanik 40-nik toqutseriarsimasutut, taassuma saniatigut aamma pasineqarluni. Peqqarniisaarniarsimasutut unnerluutigineqarpoq.
Eqqartuussinermi pisuutinneqassaguni inuunermi sinnerani parnaarussassanngortinneqarsinnaavoq.
Saassussisup saassussinini videoliaraa, videoliarlu taaanna Facebookikkut toqqaannartumik aallakaatinneqarluni. Angutit, arnallu meeqqallu qinunerup nalaani aallaaneqartut videomi takuneqarsinnaavoq.
AAMMA ATUARUK New Zealandimi inunnik 50-inik toqutsisutut 39-nillu toqutseriartutut pasineqartoq
Tarrant qaamasumik amilittut angutitut nalinginnaasutut imminut isigivoq, Norgemiorlu inorersoq Anders Behring Breivik nuannaartoralugu.
Eqqartuussineq aappaagu 2020-mi maajimi aallartissaaq.
/ritzau/
