New Zealandimi toqoraasoq peqqarniisaarniarsimasutut aamma unnerluutigineqartoq
Illoqarfimmi Christchurchimi musliimit oqaluffiisa marluk marsip qaammataani angummit sakkulisartumit saassunneqarnerat peqqarniisaarniarnertut New Zealandimi politiinit nalilerneqarpoq.
Taamaammat pasineqartoq Australiamiu 28-nik ukiulik Brenton Tarrant peqqarniisaarniarneq pillugu inatsimmik unioqqutitsisimasut aamma unnerluutigineqarpoq.
Taanna inunnik 51-inik toqutsisimasutut, allanillu 40-nik toqutseriarsimasutut aamma unnerluutigineqarpoq.
Tarrant inunnik 50-inik toqutsisimasutut maannamut unnerluutigineqaraluarpoq. Angulli Tyrkiamiu saassussisoqarnerani ajoqusertoq Christchurchimi napparsimmavissuarmi qanittukkut toquvoq, tamannalu pissutigalugu unnerluussut allanngortinneqarpoq.
AAMMA ATUARUK New Zealandimi inunnik 50-inik toqutsisutut 39-nillu toqutseriartutut pasineqartoq
Eqqartuussivimmut sassartitsinissaq juunip 14-iani pisussatut pilersaarutigineqarpoq, eqqartuussinertaviali aappaagu aatsaat pissangatinneqarluni.
Tarrantip saassusinini sianigilluarsimaneraa eqqartuussivimmullu sassartinneqarsinnaanersoq tarnip nakorsaannit maanna nalilersuiffigineqassaaq. Tarrant parnaarussivimmi immikkut isumannaallisakkami maanna parnaarussaaqqavoq.
Brenton Tarrantip eqqartuussissuserisoqarani eqqartuussivimmi imminut illersorniarluni oqaatigisimavaa.
AAMMA ATUARUK New Zealandimi saassussineq peqqarniisaarniarnerusoq
Politiit naapertorlugit toqutaasunut annattunullu ilaqutaasut 200-t missaanniittut unnerluussutip peqqarniisaarniarnermik ilaneqarneranik marlunngormat ilisimatinneqarput.
Premierministerip Jacinda Ardenip Australiami sakkut pillugit inatsisiliornerup aaqqiissuuteqqinneqarnissaa akuersissutigitippaa. Taamaammat sakkunik pisinissaq pigisaqarnerluunniit siunissami ajornarnerulissaaq.
New Zealandimi peqqarniisaarniarnermut pillaatit sakkortunersaat tassaavoq inuuneq naallugu parnaarussaaneq.
