Angalatitsisartoq Svalbardimi nalunaaqqaarani angallassisimasutut akiligassinneqartoq
Norskit qeqertaat Svalbard Nordkapip Qalasersuullu akornanniittumi takornariat issittumi uumasunut avatangiisinullu aarlerinartorsiortitsipput.
Taamaammat pinngortitap uumasullu paarinissaat siunertaralugu takornariartitsinermut sukannersunik malittarisassiortoqarsimavoq.
Angalatitsisartut Svalbardimi takornariartitsinissamut pilersaaruteqarunik angallassinissaminnik oqartussanut sapaatit akunneri arfineq-pingasut sioqqullugit nalunaarutiginnittarnissaat malittarisassat ilagaat.
Malittarisassarli taanna franskit angalatitsisartut qanittumi soqutiginngitsuusaarniarsimavaat.
Svalbards Guvernør taama allaaserisaqarpoq.
Angalatitsisartummi Svalbardimi marsip 29-anit apriilip arfineq-pingajuannut angalaartitsinerit marluk nalunaarutigisimanngilaat.
Angallassinermi ataatsimi takornariat ilaat nakorsamit ikiorneqartariaqalersimavoq. Tassungalu atatillugu angalaartut angalanerminnik nalunaarutiginnissimanngitsut paasivaat.
- Sumiiffinni takornariat isumannaatsuunissaannik qulakkeeriniarneq inatsimmi ilaatigut siunertaavoq. PIsumi uani angallassisartut angallassinissamik pilersaarutitik nalunaarutigisimanngilaat, taamaammat angallassinerup taamaatinneqarnissaanik Longyearbymullu uteqqinnissaannik peqquneqarput, Svalbardimi politiinit unnerluussisussaatitaasoq, Magnus Rindal Frederiksen oqarpoq.
Angalatitsisartoq tamatuma kingorna 100.000 norske koruuninik tassa 65.000 koruunit missaannik akiligassinneqarpoq.