Angajoqqaat perorsaasunut suleruluttunut tapersiisut
![](/sites/default/files/styles/image_934x467/public/article_images/dsc_0217.jpg?itok=MvemAO6G)
Persorsaasut sulinermi atugaat ajorluinnartut, Nuummi meeqqerivimmi Sikkersumiittartunut angajoqqaarpaaluit suaarutigaat.
Perorsaasut meeqqat angerlarsimaffiup avataani ingerlalluarnissaannik qulakkeerinnittaraluartut sulinermi atugaat ajorluinnartut, angajoqqaarpaaluit ilaat Inaluk Olsen Heilmann oqarpoq.
- Perorsaasut inuiaqatigiinnut tunngaviulluinnarmata pingaaruteqaqaat, Inaluk Olsen Heilmann oqarpoq.
Taassuma qitornani ataatsimik ukiulik meeraaqqeriviliaakkaangamiuk sulisussaaleqineq paarlatsillu meeqqat aqqinik ilisimanninngittarnerat ajornartorsiutit ilagigaat maluginiarsimavaa.
Ajornartorsiutit taakkua sorpassuarnut sunniuteqartut iliuuseqarfigineqartariaqartullu, Inaluk Olsen Heilmann isumaqarpoq.
Assersuutigalugu perorsaasut sulinermi atugaasa pitsanngorsarnerisigut iliuuseqarfigineqarsinnaapput, akissarsiaallu perorsaasutut ukiunik sisamangajannik ilinniagaqarsimanerannut sulerulunnerannullu naleqqussarneqartariaqarlutik.
AAMMA ATUARUK Perorsaasussaaleqineq: Kommuneqarfik Sermersuup inatsisit unioqqutikkai
Meeraaqqerivimmimi sulisup ataatsip meeraaqqat 14-it akisussaaffigigai, angajoqqaat ilaata siumorsimavaa.
- Sulisut amigaraangamik isumagisassaminnillu ulapputeqaraangamik meeqqat saaffissaaleqileraangata tamarmik immikkut qisuariartarput.
- Ilaat nipaarlunngortarput ilaalu meeraqatiminnut qajassuaalertarlutik, Inaluk Olsen Heilmann oqarpoq.
Meeraqatigiiaat ataatsit perorsaasumit ataatsimit, perorsaanermik ilinniarsimasumit ataatsimit perorsaasullu ikiortiannit ataatsimit paaqqutarineqarnissaat inatsisini minnerpaatut piumasaqaataavoq.
Kommuni meeqqat isumannaatsuunissaannut inatsisillu naapertorneqarnissaannut akisussaasuusariaqartoq, Inaluk Olsen Heilmann isumaqarpoq.
Sulisullu amigaraangamik angajoqqaat tamanna pillugu ilisimatinneqarneq ajukkajummata sulisut angajoqqaallu attaveqaqatigiinnerat aamma kipiluttunarpoq.
- Sulisut sulisunut ataasiakkaanut tunngatillugu oqaaseqarsinnaatitaanatik kommunimit ilisimatinneqarnikuummata sulisunit ilisimatinneqaqqusaanngilagut.
Tamanna sulisunut toqqissisimanaranilu sulinerannut sunniuteqarpoq.
AAMMA ATUARUK Meeqqerivimmi aqutsisoq: Ineriartornissamut periarfissat sulisunik attassinissamut iluaqutaasinnaapput
- Tamanna ima eqqarsarnarpoq: Meeqqat tuppallersarneqartarpat, nangii taarserneqartarpat imaluunniit tusaaneqartarpat?
- Qitornaralu kappiagisaqaara, eqqarsartarlunga aagukku qanoq issanersoq. Perorsaasunik allanik ilisarisimanngisannik sulisortaarsimanerpat? Qitornama aqqa ilisimavaat?
Inaluk Olsen Heilmann taama nassuiaavoq.
Kommuneqarfik Sermersuumi meeqqanut atuarfeqarnermullu ingerlatsiviup pisortaa KNR-imut akissuteqarluni ilaatigut meeqqerivinni sulisussaqarniarneq ajornakusoortuusoq allappoq.
- Sulisussaaleqineq arlalitsigut sulerulunnermik pilersitsisarpoq. Taamaammat sulisussanik meeqqanut paaqqinnittarfinni pilerisaarisaraluarpugut, kiisalu sulisut sulereersut sulitiinnarniartarlugit, Lone Nukaaraq Møller allappoq.
Assersuutigalugu sullivinni avatangiisit pitsaanerulersikkumallugit kommunep persorsaasoqatigiit ikorfartoqatigiinnissaat nukitorsarniarpaa.
- Nuummili initaarnissamut utaqqinarpoq. Taamaammat atorfinittussat inissaminnik neqoroorfigisinnaalernissaasa tungaanut utaqqiisaasumik sulisussanik atorfinititsisarpugut, pisortaq Lone Nukaaraq Møller taama allappoq.
Taassuma angajoqqaat pissutsinik tamakkualu kommunip qanoq iluarsiniarnerai pillugit paasissutissiinniarlugit ataatsimeeqatiserisimavai.