Erseqqissaaneq: Karen M. Karlsenip pania Avannaata Kommunianit Nuuk Outdoorimut inissinneqarsimasoq ilanngutassiami siusinnerusukkut erseqqissarneqarsimanngilaq. Niviarsiaraq Kommuneqarfik Sermersuumit inissitaanngilaq. Tamanna maanna allassimavoq.

- Toqqissisimananngilaq annilaangaanartarpoq, meerarput isumaalugisarparput, Maren M. Karlsen, panimi 14-inik ukiullip Nuuk Outdoorimit paarineqarnera pillugu KNR-imut oqarpoq.

Kommuneqarfik Sermersuup meeqqat angerlarsimaffiup avataanut pinasuartumik inissinneqartut nunaqarfimmi Kapisilinni illuaqqani najugaqartissimagai KNR-ip juullip ukiortaallu akornanni saqqummiupaa. Takornarialerisut suliffeqarfiat Nuuk Outdoor meeqqanik paarsisuusoq saqqummiunneqarpoq.

Kommuneqarfik Sermersuup oqarnera naapertorlugu Maren M. Karlsenip pania Avannaata Kommunianit Nuuk Outdoorimut inissinneqarsimavoq.

Kommunip oqarnera naapertorlugu meeqqat Nuummut maanna nuunneqarput, kisianni taakku suneqarnissaannut suli pilersaaruteqartoqanngilaq. Kommunip Nuuk Outdoorimut inissiineq meeqqanut ataavartumik inissiiffissaqalernissamut pappiaqqanik suliarineqarnermi ajornartoornermi aaqqiissutaanerarpaa.

Meeqqat Nuuk Outdoorimit paarineqartut Nuummut utertinneqareeraluartut taakku qanoq pinissaannik suli pilersaarusiortoqanngitsoq, Kommuneqarfik Sermersooq paasissutissiivoq.

Upernavimminngaanneersup Maren M. Karlsenip pania meeqqat angerlarsimaffiup avataanut inissinneqarsimasoq takornarialerisumit Nuuk Outdoorimit martsip missaanili paaqqutarineqalerpoq.

Maren M. Karlsen panimi qanoq inneranik, qanoq paaqqutarineqarneranik allanilluunniit pingaarutilinnik qanoq pisoqarsimaneranik paasitinneqarneq ajorpoq.

- Sumunnassanersoq sunersorlu nalunaarfigineqarneq ajorpunga. Soorlu massakkut naluarput aamma inuttaata nammineq naluaa Kapisilliaqqissanerluni, Maren M. Karlsen oqarpoq.

Paasissutissinneqarneq ajorneq ernumanartoq toqqissisimananngitsorlu

Maren M. Karlsenip qitornani ukiumut amerlannerpaamik marloriarluni, tassa aasaanerani juullikkunnilu, ilageqqusaavaa.

Ulluinnarni paasissutissiinnarneqartanngilaq, pinartoqarsimatillugumi Nuuk Outdoorimit aamma paasitinneqartanngilaq, assersuutigalugu arlaannik pisoqarsimatillugu paniata nammineerluni arni saaffigigaangagu arnaata panimi paarsisui sianerfigisarpai.

Soorlu panini imminut innarlersimatillugu sulisut sinnerlugit iliuuseqarsinnaasannginnami isumaaluttarpoq.

- Imminut kilertitersimalluni sianermat sulisuanut isumaalullunga sianerama sulisuata nipini qaffallugu misiginneqataarpalugani saassussereerluni suangarpalulluni apererpallappaa imminut kilertitersimanersoq.

Meeqqanut sullissisut mobilernerujussui meeqqallu namminneernerusut, Maren M. Karlsen oqarpoq, taassumalu panimi Nuuk Outdoorimit paaqqutarineqarnera isumannaatsuusorinngilaa.

Siunissaa qularnartoq

Taassumali ernummataa taannaannaaqqajanngilaq. Paninimi atuartanngimmat siunissaa aamma ernummatigalugu oqarpoq.

- Oqartussaasuniit sumiginnarneqaannarnera, atuartinneqannginnera ilikkagassarpassui pikkoriffippassui asuli atorneqannginneri uannut sakkorput, Maren M. Karlsen oqarpoq

Kommunip meeqqat Nuummut juullinnginnerani nuutsippai, taakkulu pillugit qanoq iliuuseqartoqarnissaanut suli pilersaaruteqartoqanngilaq.

Naalakkersuisut ulloq unnuarlu angerlarsimaffiit kommunillu suleqatigalugit suleqatigiissitamik ukiaq pilersitsisimasut taassuma aamma paasissutissiissutigaa. Suleqatigiissitaq nalunaarutinik inatsisinillu suliaqarnermik misissuissasoq Aqqaluaq B. Egede oqarpoq. 

Aqqaluaq B. Egedep nunatsinni meeqqat angerlarsimaffiup avataanut inissinneqarsimasut iluamik paarineqarsinnaanissaat qulakkeerniarlugu inatsimmik allannguisoqarnissaa pisariaqartoq KNR-imut tallimanngornermi januaarip ulluisa tallimaanni oqaatigaa.

KNR-ip Nuuk outdoorimeersut oqaaseqartinniaraluarpai, taakkuali ilanngutassiap suliaralugu nammassiffissaani akissuteqanngillat.