Amerluutilinnik passussinermik nunatsinni pikkorissaasoqartalissasoq
Amerluutilinnik passussinermik nunatsinni pikkorissaasoqartalissaaq. Aningaasaateqarfik A.P. Møller Fonden 1 millionit koruuninik tunissuteqarmat tamanna pisussanngorpoq.
Peqqinnissaqarfik tusagassiutinut taama nalunaarpoq.
Meerartatta pingajorarterutaasa missaat seerisunik ungilattunilluunniit amerluuteqarput, tassa eksemerput eksemernikuullutilluunniit. Danmark sanilliukkaanni tassani meeqqat 20 procentiisa missaat eksemerput.
Tassa nunatsinni silaannaq panermat, sivisuumik ukiuusarnerani oqorsaaterpassuaqarfiusarmat qaamanikittarmallu ajorseriakkajuttumik amerluutillit amerlapput.
- Amerluutit pillugit itinerusumik paasissutissaateqarnissaq pisariaqartinneqarpoq, paasissutissallu taakku tamaani atukkavut aallaavigalugit naleqqussassavagut, nunatsinni nakorsaq amerluutit pillugit immikkut ilisimasalik amerluutinillu nakorsiartarfimmut akisussaasuusoq Lone Hove oqarpoq.
- Pikkorissaasalernissatsinnut aningaasat pisariaqartitatta affaasa missaat suli amigaatigaavut, maannali aallartinissarsinnaalerpugut.
Pikkorissaanissat siulliit aasaru pissagunartut
Pikkorissaasartussat nunatsinni amerluttunik passussinermik pikkorissaanermut najoqqutassialiortassapput, pikkorissaajartorlutillu nunatsinni angalaartassapput - taavalu eksem pillugu paasisanik naggataatigut katersuissallutik.
Taakku Dronning Ingridip Peqqissaaviata Nuummiittup ataaneersutut sulissapput.
Pikkorissaajartorlutik angalanissat siulliit Narsami, Qaanaami Qeqertarsuatsiaanilu pissapput.
- Soorlu meeraaqqerivinni perorsaasut, ilinniartitsisut, angajoqqaat taavalu peqqissaavinni nunaqarfinnilu nakorsiartitsivinni sulisut eksem pillugu paasissutissinneqarnerunissamik pisariaqartitsipput. Soorlu amerluutinik passussinermut, ajorseriartoornissamik pinaveersaartitsinermut, tarngutinut amerlunnerulernaveersaatilinnut taavalu meeqqanik amerluttunik asattuinermut passussinermullu tunngasuusinnaapput, Lone S. Hove oqarpoq.
Amerluutilinnik passussinermik pikkorissaanissaat siulliit Nuummi aasaru pissasut neriuutigaat.
Tamatuma kingorna pikkorissaanissaat allat sineriammi nunaqarfinni toqakkani aasap ukiallu ingerlanerini pissangatippaat.
Aamma nunatsinni eksemertut psoriasisertullu Dronning Ingridip Napparsimmavissuani nakorsiartarfimmi februaarip aallartinneranili qinngornernik katsorsarneqarsinnaalerput.
