Nunatsinni aatsaat siullerpaamik: Qinngornernik katsorsaaneq amerluutilinnut iluaqutaassasoq
Kalaallit soorlu psoriasisimik eksemimillu amerluuteqartut Nuummi qinngornerit atorlugit katsorsarneqarsinnaanngungajalerput.
Nunatsinnimi amerlavallaartut amerluuteqarput, amerluutaallu nunatsinni silaannaap panerneranit, ukiup sivisuup atisarpassuaqarfiusariaqartup seqerngullu qaamanerata annikinnera pissutigalugit ajornerulertarput.
Taamaammat Nuummi Nakorsiartarfik UV-mik qinngornerit atorlugit katsorsaanermut atortorissaarutinik nutaanik pingasunik pisivoq. Mikisut marluk assannut isikkanullu ataaserlugu timimut tamarmut. Atortorissaarutit imaattut aatsaat siullerpaamik nunatsinni atorneqassapput.
- Eksem amerluutaavoq ammip panerneranik ungilangaatsiarneranillu ilisarnaateqartoq.
- Psoriasis anigorsinnaanngisamik amerluutaavoq, aappaluttunik naajorarnermik amillu issutsinneranik qaqortunillu qalippeqqaneranik ilisarnaateqartoq.
Paasissutissarsiffik: netdoktor.dk
- Maskiinat UVB-mik qinngorneqarput, tungujortunik qinngorneqartut takusinnaavarput. UVB seqerngup qaamarngata ilaanit pisarparput, maskiinalli qinngornera sakkortuneruvoq. Maani Kalaallit Nunaanni seqineqarpallaarneq ajoratta ingammik ukiukkut, taamaammat maskiinat ukua seqernup qinngornerata pinissaanut ilapertuutaasinnaapput, nakorsaq immikkut ittumik ilinniarsimasoq, nunatsinnilu amerluttunut akisussaasoq, Lone Hove oqarpoq.
Nunatsinni amerluutit nalinginnaasut marluupput: eksem aamma psoriasis. Nunatsinni innuttaasut 5 procentii psoriasisimik amerluuteqarput.
- Tassa imaappoq inuit 2.500-t missaanniittut psoriasiseqarput, Lone Hove oqarpoq.
Kalaallit meerartaasa 30 procentii meeqqat eksemiannik aamma taaneqartartumik eksemeqarput.
- Meeqqat ilaasa amerluutertik katattarpaat, ilaalli inersimasunngornerminni atugariinnartarpaat, taamammat Kalaallit inersiamasut 10 procentiinit 15 procentiinut eksemeqarput, Lone Hove oqarpoq.
Danmarkimut sanilliukkaanni danskit meeqqat 20 procentiisa missaat eksemeqarput, danskillu inersimasut 5 procentiisa missaat eksemeqarlutik.
Seqernup qaamanera naammanngitsoq
Amerluuteqartut ataasiakkaat amerluutaasa katsorsarnissaata qanoq innissaat assigiinngitsoq, Lone Hove nassuiaavoq.
Ilaasa tarnut kinertoq sakkukitsoq pisariaqartiinnartarppat, ilaasa tarnut hormonitaqartoq pisariaqartippaat. Amerluutillillu ilaasa amerlaatimi suanngannginnissaannut iisartakkat pisariaqartittarlugit.
Foto: KNR/Carsten Faurschou.
- Qinngornerit atorlugit katsorsaaneq amerluuteqartunut allatut periarfissaavoq. Taanna allatut katsorsaasinnaavoq, tassami UV-mik qinngornerit sananeqaatinut katsorsaataasinnaapput. Taamaammat tarnutinit iluaqutaasumit allatut katsorsaatigineqarsinnaavoq, Lone Hove oqarpoq.
Nunatsinni ukiup ingerlanerani seqinernup qaamanera annertuallaarneq ajorpoq, aasaaneranilu qineq pukkitsunnguusarluni. Taamaammat amitta seqinermik qaamaffigitinnerata annertussusaa killeqarpoq.
- Amerluuteqartut ilaasa seqinnertittarnissaat pingaaruteqartorujussuuvoq. Tamakkuusinnaapput assersuutigalugu igitsiniliarlutik seqinnisaariarluarsinnaasut, Lone Hove oqarpoq.
Taakkulu taama katsorsarneqarnissartik nunatsinni maanna pissarsiarisinnaalissavaat.
Sineriatsinni periarfissaalissasoq
Avannaaniinnerungaanni seqineq annikinnerulertarpoq. Taamammat inuit nunatta avannaaniittut Nuummiittunit seqinertinnginnerusarput.
Taamaammat Lone Hove suleqataalu sineriammi nunaqarfimmi UV-mik katsorsaanermut atortorissaaruteqalernissaanut aningaasanik katersileruttorput.
Maskinat pingasut Nuummiittut 500.000 koruuneqarput.
Sineriammi amerluuteqartut Nuummut katsorsarneqariartorsinnaagallassapput.
- Nunap immikkoortuini allani amerluutillit pisariaqartitsisut maannga Dronning Ingridip Napparsimmavissuanut innersuunneqarsinnaassapput, taakkulu maanna timmisartuunneqarlutik katsorsarneqarnermi nalaanni peqqissartut inaanniissinnaapput, Lone Hove oqarpoq.
UV-mik katsorsaatit ataasinngornermi februaarip arfernanni atulissapput.
