Naalagaaffiup politiivi: Amerikamiut software-iata isumaqatigiinngissutaasup Kalaallit Nunaanni atorneqarnera isumannaallisaanikkut navianartorsiortitsinngilaq
Kalaallit Nunaanni Politiit danskit misissuissutaat Pol-Intel siorna novembarimi atulerpaat.
Amerikamiut suliffeqarfiata Palantirip software-ianit ineriartortinneqarpoq, taannalu Donald Trumpimut USA-llu isertortumik paasiniaasartoqarfianut illersornissaqarfianullu qanimut attaveqarpoq.
Naalagaaffiulli politiivinit oqartoqarnera naapertorlugu maannamut isumannaallisaanikkut navianartorsiortitsinngilaq.
- Naalagaaffiup politiivisa Pol-Intelip atorneqarnissaanut malitassarititaasut tunngavigalugit misissuissutip Kalaallit Nunaanni Politiivinit atorneqannginnerani nutaanik aarlerinassutsimik nalilersuisoqarnissaa pissutissaqarsorinngilaat, Naalagaaffiup politiivisa KNR-imut allakkatigut oqaatigaat.
Nunat arlallit Palantirip software-iannik atuinnginnissaq anguniarneqarsimagaluarpoq allaanerusumilluunniit ujaasisimagaluarput.
Ilisimatusartut marluk Palantirip atorneqarnera isumannaallisaanikkut navianartorsiortitsisinnaasoq Børsenimut oqaatigisimavaat. Tassa Amerikamiut misissuissummi isertortumik iserfiit atorlugit nunarput pillugu paasissutissanik pissarsinissamut atorsinnaammassuk.
Nunatsinni qarasaasiatigut atortorissaartoqartariaqartoq
Folketingimut ilaasortaq Naaja H. Nathanielsenip (IA) Kalaallit Nunaanni Politiit qarasaasiatigut atortorissaarutit pisariallit tungaatigut kinguarsimanerat KNR-imut oqaatigaa.
Naalagaaffimmi politiit oqarnerat naapertorlugu misissuut Pol-Intel atorlugu Kalaallit Nunaanni Politiit politeeqarfiit allat naligilissavaat:
- Kalaallit Nunaanni Politiit politeeqarfiit allat naligalugit Pol-Intelip ujaasissutaanut misissueqqissaarutaanullu isersinnaapput. Tamanna suliassaminnik naammassinnissinnaanerminnut tunngavissaqarluarnissaannut ikiorsiissutaassaaq, Naalagaaffiup politiivi oqarput:
- Taassuma software-ip ilaatigut assigiinngitsorpassuarnik paasissutissanik toqqorsivinni ujarlernissamut, taamaalilluni inunnut, najukkanut, angallatinut assingusunulluunniit paasissutissarsipallannissamut aamma misissueqqissaarnernut aamma misissuinernut atorneqartussanik, kiisalu allaffissornikkut suliassat tapersersorneqarnissaannut Kalaallit Nunaannut Politiit periarfississavai.
Naaja H. Nathanielsenip Danmarkimiinnaq nunatsinniinnarluunniit Pol-Intelip atorneqarneranut isumannaallisaanikkut navianartoqassappat allannguuteqarujussuarunnanngitsoq erseqqissaatigaa.
Naalagaaffiup politiivi isumannaallisaanikkut aarlerinartup Danmarkimi nunatsinnilu assigiissasut isumaqarput:- Tamanna Naalagaaffiup politiivi naliliipput, Pol-Intelimik atuinerup isumannaassusaa assigiittoq, Danmarkimi politiinit Kalaallit Nunaanniluunniit politiinit atorneqaraluaruni.
Iliuusissatut pisariaqartinneqartut
Naalagaaffiup politiivi Pol-Intelimit paasissutissat Danmarkimi toqqorsivinniitinneqartarnerat taakkulu danskinit aqunneqarnerat nakkutigineqarnerallu oqaluttuaraat.
- Paasissutissanik isumaginninneq Palantirimi siunnersortinit isumagineqarpoq, taakkulu Pol-Intelip ineriartortinneqarneranut, ingerlanneqarneranut iluarsaanneqarneranullu tunngatillugu politiinut ikiuuttarput.
Taassuma saniatigut Palantirimi siunnersortit allatulli siunnersortitut isumannaallisaanikkut akuersissuteqartarput nipangiusimasussaatitaallutillu.
- Palantirimit siunnersortit politiinilu sulisut politiit systemiini allanilu paasissutissanik tunngavilersorluakkanik sulianullu tunngatillugu taamaallaat atorneqartarnissaata akuersissutigineqarneranik ilinniartinneqartarput. Paasissutissat eqqortumik atorneqarnissaat qulakkeerniarlugu Pol-Intelimi atuisut tamarmik iliuusaat nalunaarsorneqartarput tamannalu pillugu siusinaartumik nakkutilliisoqartarpoq, Naalagaaffiup politiivi oqarput.
