Amerikamiut qulimiguui CH47-t qimminik qamutinillu assartuisussaagaluartut

Avannaata Qimussersua ingerlanneqalerpat amerikamiut helikopterii marluk qimminik qamutinillu assartuisussaasimangaluarput.

Allattoq Irene Jeppson

marsip 25-at 2025 15:27

Allakkat KNR-ip takunniffigisinnaasa takutippaat, Kalaallit Nunaanni Qimussertartut Kattuffiat amerikamiut illersornissamut ministeriannilk Peter Brian Hegsteh-imik Avannaata Qimussersuanut qaaqqusisuusoq. Allakkalli aamma allanik imaqarput.

Allakkani ilaatigut, siulittaasoq Mikkel Jeremiassen Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut saaffiginnissimasoq, avannaata qimussersuanut atatillugu qulimiguullit marluk CH47-t assartuinermut atorneqarsinnaasut kiisalu amerikamiut illersornissamut ministeriata qaaqquneqarnissaannut ikioqqusimasut atuarneqarsinnaavoq.

Ikiuussinnaavisi?

Mikkel Jeremiassen februarip 18-ni mailikkut Naalakkersuisoqarfimmut ima allappoq:

- Avannaata Qimussersua 29.marts.2025 Sisimiuni ingerlanneqartussami KNQK assartuinikkut angallassissutinik tulluunnerusunik ujartuinerminut atatillugu quliminguullit marluk (CH47) assingisaanilluunniit misissuinerit toqqaannaq nunaqarfinnut kiisalu suluusalinnut mittarfeqanngikkaluartunut assersuutingalugu Qeqertarsuarmut, Saqqamut, Qasigiannguanut, Kangaatsiamut, Saattunut, Innaarsunnut, Tasiusamut, Nuussuakkunnut missinnaasut misissorpagut.

Naalakkersuisoqarfiup pisortaa amerikamiut illersornissamut ministerianik qaaqquseqataasinnaanersoq, Mikkel Jeremiassen aamma mailimi aperivoq.

Aamma atuarukKattuffik amerikamiunut qaaqqusisuusoq

"KNQK-p Siulersuisuuneri sinnerlugit (qaaqqusissutissaq kakkiussamiittoq) naalakkersuisoqanngikkallarnerup nalaaniinneq pissutingalugu uangullu kulturimut timersornermullu naalakkersuisoqarfiup ataaniinnerput innersuussutingalugu USA-mi illersornissamut ministeri qaaqquseqataaffingisinnaaviuk?

Tamannali naalakkersuisuugallartoqartillugu ajornartoq, Naalakkersuisoqarfiup pisortaa KNQK-mut allappoq:

- USA-mi illersornissamut ministerip Avannaata Qimussersuaqartitsisoqarnerani qaaqquneqarnissaanut naalakkersuisoqarfimmi pisortatut qaaqquseqataasinnaanersunga apeqqutigaarsi. Naalakkersuisoqarfimmiit innersuussutigerusupparput Naalakkersuisuugallartut sulineranni najoqqutassat massakkut atuuttut.

- Tassani ilaatigut aalajangersarneqarpoq Naalakkersuisuugallartut atorfimmi suliassat ingerlaannarnissaannut pisariaqartumik taamaallaat suliaqarsinnaasut, aammalu aalajangersarneqarpoq Naalakkersuisut politikkikkut aalajangiisinnaanngitsut, soorluttaaq suliani annertuuni allaffissorfinnikkut aalajangiisoqarsinnaanngitsoq.

- Naalakkersuisoqarfimmi pisortatut sulininni Naalakkersuisuugallartoqarnerani apeqqutigineqartumut najoqqutassat atuuttut tunngavigalugit qaaqqusisutut peqataasinnaananga nalunaarutigissavara, Nuka Kleemann akivoq. Tamanna KNR-ip takunniffigisinnaasa takutippaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.