Amerikamiut parnaarussaaqqasimasut iperagaareerlutik USA-mut angerlartut
![](/sites/default/files/styles/image_934x467/public/2024-08/20240802-084413-L-1920x1278we.jpg?itok=rxko9qqp)
![](/sites/default/files/styles/image_934x467/public/2024-08/20240802-084406-L-1920x1214we.jpg?itok=sxMul7P2)
![](/sites/default/files/styles/image_934x467/public/2024-08/20240802-080424-L-1920x1297we.jpg?itok=UCAoJlOY)
Tusagassiortoq USA-meersoq Evan Gershkovich, sakkutuujusimasorlu Paul Whelan, parnaarussanik paarlaasseqatigiinnikkut Ruslandimit iperagaapput.
Amerikamiut marluk taakku kilitsissiatut sulisimasutut pasineqarlutik sivisuuumik parnaarussaaqqasussanngortinneqarnikuugaluarput, USA-mulli ullaaq manna uterlutik.
Nutaarsiassaqartitsivik Reuters taama allappoq.
USA-p præsidentiata Joe Bidenip præsidentillu tullersortaata Kamala Harrisip amerikamiut parnaarussaaqqasimasut ilaatigut tikilluaqquaat.
- Nuanneqaaq. Sivisuumik utaqqisimallugu. Iluatsissinnaanissaa upperiuaannarpara. Suleqatigiilluni angusaqartoqarsinnaasoq oqarpunga, Joe Biden oqarpoq.
Amerikamiut katillugit pingasut Ruslandimi parnaarussaaqqasimasut iperagaapput, nunat arfineq-marluk suleqatigiillutik parnaarussanik paarlaasseqatigiinnerini taakku Tyrkiap illoqarfiisa pingaarnersaanni Ankarami ilaatigut iperagaallutik.
Tyrkia parnaarussanik paarlaasseqatigiittoqarnissaani isumaqatigiissitsiniartuuvoq, parnaarussat katillugit 24-t, meeqqallu marluk paarlaasseqatigiissutigineqarlutik. USA-mi, Norgemi, Tysklandimi, Polenimi, Sloveniami, Ruslandimi Belarusimilu parnaarussat paarlaasseqatigiissutigineqarput.
Sorsunnerup nillertup nalaaniilli parnaarussanik aatsaat taama amerlatigisunik paarlaasseqatigiittoqartoq, nutaarsiassaqartitsiviit arlallit allaaseraat.
Amerikamiut marluk kilitsissiatut sulisimasutut pasineqarlutik Ruslandimi parnaarussaaqqagaluarput. USA-lli pasilliutit ilumuunnnginnerarpai, parnaarussaaqqasullu marluk pissutissaqanngitsumik parnaarussaaqqasut oqaatigalugu.
Russit nunani allani parnaarussaaqqasimasut arfineq-pingasut Ruslandip præsidentianit Vladimir Putinimit aamma tikilluaqquneqarput.