USA-p isertortumik alapernaarsuinera pillugu allagaatit Ruslandip iluaqutigisinnaagai

USA Ruslandip isumannaallisaanermut qullersaqarfiinik, isertortumillu paasiniaasartuinik alapernaarsuillunilu anngiortumik tusarnaartarsimasoq, allagaatit isertuussat USA-p illersornissaqarfianeersut, kinaassutsiminik isertuussisumit saqqummiunneqarsimasut takutippaat.

Russit sakkutuuisa saassussisinnaassusiat, saassussinissamillu pilersaaruteqarnerat USA-p Ukrainemiunut mianersoqqussutigisinnaasimagaat, naliliinerit tutsuiginartut aamma takutippaat.

Russit sakkutuui Ukrainemi sakkuaannerni ajornartorsioqisut allagaatini naliliinerni takuneqarsinnaasoq, aviisip The New York Timesip pingaarnertut allaaserisaani takuneqarsinnaavoq, russillu sakkutuuisa kanngunaannartuliorsimanerinik aamma takussutissaqartoq oqaatigineqarluni.

Allagaatinik kikkut saqqummiussisimanersut ilisimaneqanngilaq

Kia allagaatit isertuussat kalerriutigisimanerai ilisimaneqanngilaq, eqimattalli Ruslandimik pingaartitsisut saqqummersitsisimanissaat ilaatigut nalunaarutigineqarpoq.

Ukrainemi sakkutuut ajornartooqisut, amerikamiut aamma nalilerpaat. Allagaatit isertuussat tamanna takutippaat. Sakkut imassaannik, raketinullu illersuutinik amigaateqarnerit taakkununnga ilaapput.

Ukrainemi aqutsisut - illersornissaqarfimmi politikkikkullu aqutsisut - amerikamiut isertortumik paasiniaasartuisa pingaarnertut alapernaarsuiffigaat, Ukrainemiut sorsunnermi iliuusissamik pilersaarutaat sukumiisumik ilisimasaqarfigerusullugit.

Russit iliuuserisaat, Ukrainemiullu sakkutuuisa iliuusissatut pilersaarutaat amerikamiut paasisaqarfigineruleraat allagaatit isertuussat takutippaat.

Allagaatit pineqartut Ukrainemiunik aamma innarliisinnaapput, amerikamiummi russit pillugit ilisimasaat Ukrainemiut paasisinnaavaat, russillu tassunga qisuariaateqarsinnaallutik.

/ritzau/