Amerikamiut admiraliat nunatsinnut tikeraalersoq
Amerikamiut sinerissami alapernaarsuisuini naalakkat qaffasinnerpaartaata Karl Schultzip kalaallit danskillu atorfillit suleqatigiinnerat oqaloqatiginnissutigiartorluigu nunarput sapaatit akunnerata tulliata naanerani tikeraassavaa.
Amerikamiut Danmarkimi aallartitaqarfianit tusagassiuutinut nalunaarut naapertorlugu admiralip, Karl Schultzip kalaallit qaffasissumi atorfillit qassiiusut ataatsimeeqatigissavai, tikeraarneranullu USA-p, kunngeqarfiup nunattalu suleqatigiinnerisa pitsaanerulersinnissaa siunertaavoq.
AAMMA ATUARUK Nunarput pissaanilissuarnit ukkatarineqartoq: Iluaqutigisinnaavarput
- Sinerissami alapernaarsuisut issittoq isumannaatsuutikkumallugu pigissaarfiutikkumallugulu inuiaqatigiinnik allanik peqateqartariaqarpoq, Karl Schultz oqarpoq.
USA-mi sakkutuut naalagaata nunatsinnut tikeraarniarnera USA-mit nunarput pillugu nunatsinnullu suliniuteqarnerit nalunaaruteqarnerillu qassiiusut ilagaat.
Nuannarineqarniarsarinerunermi ilaasoq
Amerikamiut Danmarkimi aallartitaata, Carla Sandsip nunarput ukioq manna qasseeriarluni tikeraarpaa, tamatuma saniatigut amerikamiut sinniisuni nunatsinniittut ataatsimiit arfineq-marlunnut 2020-mi amerliniarai oqaatigineqarpoq.
Tamatuma qaavatigut præsidentip Donald Trumpip nunatsinnik piserusunnerminik eqqarsaatini oqaatiginikuullugit, tamannali Naalakkersuisut siulittaasuanit, Kim Kielsenimit ministeriunermiillu Mette Frederiksenimit itigartitsissutigineqarpoq.
Amerikamiut nunanut allanut tunngasunut ministeriata, Mike Pompeop nunatsinnut tikeraarnissaa upernaaq nalunaarutigineqarpoq. Tikeraartussannguliivissorli taamaatiinnarneqarpoq.
AAMMA ATUARUK Ilisimatusartut ujartuisut: Kalaallit Nunaat Issittoq pillugu periusissiortariaqarpoq
Karl Schultzip aalisarnermut, piniarnermut nunalerinermullu naalakkersuisoqarfiup pisortaa, Jørgen Isak Olsen aamma pinngortitamut avatangiisinullu naalakkersuisoqarfiup pisortaa upalungaarsimanermullu ataatsimiititaliap siulittaasua, Mette Skarregaard Pedersen ilaatigut ataatsimeeqatigissavai.
Admiralip politimesteri, Bjørn Tegner Bay aamma Issittumi Sakkutooqarfiup pisortaa, gerneralmajor Kim Jørgensen aamma naapissavai.
