Allakkatigut taasinissaq ataasinngorpat kingusinnerpaamik periarfissaavoq
Folketingimut qinersinermut qinersiartornissannut ataasinngorpat novembarip aallaqqaataani ornigussinnaanngikkuit. Allakkatigut taasinissat piaartumik sulissutigipallattariaqarpat, tassa kingusinnerpaamik ataasinngorpat.
Kommunerisavit innuttaasunut sullissiviata allaffeqarfiata ataasinngorpat matunnginnerani saaffiginninnikkut taamaaliorsinnaavutit. Rigsombudi KNR-imut taama ilisimatitsivoq.
Kalaallit Nunaannili folketingimut qinersisarneq pillugu inatsit atuaraanni allakkatigut qinersinissap kingusinnerpaamik qaqugorpiaq killeqarnera erseqqinngilaq.
Nuna tamakkerlugu ulloq qinersiffissarititaasup ammannginnerani qinersisussap allakkatigut qinersinini piffissarititaasumi angumersinersoq nammineerluni isumagisussaavaa. Qinersinissarmi ataasinngorpat novembarip aallaqqaataani 2022 nalunaaqutaq ullaakkut qulingiluanut ammartussaavoq.
AAMMA ATUARUK Mød Grønlands kandidater til Folketinget
Tassalu imaappoq allakkatigut qinersiniaraanni najukkami kommunerisap innuttaasunut sullissiviata allaffeqarfiata matunnginnerani tamanna pisariaqassaaq, tassalu ataasinngornermi novembarip 31-iani allaffiup matunnginnerani.
Nunatsinnili innuttaasunut sullissiviit allaffii amerlanerit ualikkut pingasunut matugajuttarput, qularnaatsumilli paasilluassagukku ammasarfiit misissorluaqqaakkit.
Allakkatigut qinersineq kommunimut allamut nassiunneqartussaasimassappat apuulluarnissaa inuup nammineerluni akisussaaffigigaa, rigsombudi ilisimatitsivoq.
Danmarkimi najugaqarsimaguit tamatumalu nalaani nunatsinniikkallarlutit imaluunniit Savalimmiuniikkallarlutit, nunami aggerfigisanniittunik taasisinnaavutit, taamaaliorsinnaavutillu kommunimi innuttaasunut sullissiviup allaffeqarfianut saaffiginninnikkut allakkatigut qinersillutit.
