Silaarunnartulimmik imigassartortarneq apparaluttuinnarpoq

Imigassamik silaarunnartulimmik maani 2017-ip ingerlanerani 370.000 liiterinik eqqussuillunilu sanaartortoqarpoq. Ukiumut siulianut naleqqiullugu 13.000 liiterinik appariaateqarluni. Imaluunniit 2016-imut naleqqiullugu 3,5 procentinik appariarluni.

Qilakkunnanngilagulli.

Imigassaq silaarunnartulik 2017-imi eqqunneqartoq maani 14-ileereersimasunut tamanut imigassat 8,4 liiterit naligaat. Imaluunniit sapaatip akunneranut ataasinnguartornerit aqqanillit.

AAMMA ATUARUK Imigassanik nittarsaasseqqusinnginneq 1. marts atuutilissaaq

Immiaarartorneruvugulli, viinnilu tullersortaalluni.

Allatut oqaatigalugu: Kalaallit Nunaanni imigassartortarneq ammuinnaq ingerlavoq.

1988-imi imigassaq silaarunnartulik 688.000 liiteri eqqunneqarsimavoq.

Imigassamik atuineq ukiut 30-it ingerlaneranni 46 procentimik apparsimavoq - tassalu affaannanngungajassimalluni.

- Taakku saniatigut Danmarkimi naatsorsueqqissaartarfiit kisitsisaataasa takutippaat danskit 14-ileereersimasut tamarmik agguaqatigiisillugu imigassamik silaarunnartulimmik ukiumut 9,4 literinik imertartut, tassa Kalaallit Nunaanni imerneqartartunit qaffasinnerusumik, uagut 8,4 "liiterinnaasut".

AAMMA ATUARUK Imigassamut inatsisip Tasiilami malinneqarnera equngasortaqartoq