Imigassanik nittarsaasseqqusinnginneq 1. marts atuutilissaaq

Inuinnarnut internetikkut nittarsaaneq Imigassaq pillugu inatsisip nutaap atuutilersinneqarneratigut inerteqqutaalissaaq. Sassaallertarfiilli tuniniaaviillu niuertarfiup iluani assiaqutilinni imigassanik aalakoornartortalinnik tuniniaavinni sassaallertarfinnilu nittarsaassisoqarsinnaassaaq.
 
- Imigassanik aalakoornartortalinnik nittarsaassinissamik inerteqquteqarnermi imigassanik aalakoornartortalinnik nittarsaassinerup killilersimaarneqarnissaanik WHO-p kaammattuutai imigassaq pillugu inatsit malinneqarpoq. Nittarsaassinerit siunertaat ataasiinnaavoq, tassalu piseqqusaarineq aammalu sapinngisamik amerlasuunik pisiniarnissaq kiisalu meeqqat inuusuttuaqqallu nittarsaassinernut sunnertiasuusut ilisimavarput. Taamaattumillu imigassanik aalakoornartortalinnik nittarsaasseqqusaannginneq pitsaaliuinermi pingaaruteqarpoq meeqqat inuusuttuaqqallu eqqarsaatigalugit, Peqqissutsimut naalakkersuisoq Agathe Fontain taama oqarpoq.

AAMMA ATUARUK Niuertarfinni imerniartarfinnilu sulisut pikkorissartinneqassasut

Imigassanik aalakoornartortalinnik akeqanngitsumik tunniussinissaq inatsisitigut aamma inerteqqutaalissaaq.
 
Tusagassiorfiit nunanit allaneersut kiisalu niuertarfinni sassaallertarfinnilu assiaqutilinni nittarsaassinerit nittarsaassinissamik inerteqquteqarnermi aamma ilaatinneqanngillat.
 
Nunat arlallit, Island taakkununnga ilaalluni, imigassanik aalakoornartortalinnik nittarsaasseqqusinnginneq imigassanik aalakoornartortalimmut tunngasutigut pitsaaliuinermik ilaattut atuutsippaat.

AAMMA ATUARUK Naalakkersuisut sakkukillisaanissaq piareersimaffigigaat