Niuertarfinni imerniartarfinnilu sulisut pikkorissartinneqassasut
Imigassaq pillugu inatsit nutaaq ukioq manna marsip aallaqqaataani atuutilerpat, sulisut imigassanik aalakoornartortalinnik tuniniaanermik sassaallertarnermillu suliaqartut akisussaassuseqartumik nioqquteqarnissamut akisussaassuseqartumilluunniit sassaallernissamut pikkorissartinneqassapput.
Akisussaassuseqartumik tuniniaanissamut sassaallernissamullu internetikkut pikkorissartitsinernik Peqqissutsimut Naalakkersuisoqarfik suliffeqarfinnut neqerooruteqassaaq.
- Imigassaq pillugu inatsisip nutaap ilaatigut nassatarissavaa imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik nioqquteqarnissamut sassaallernissamullu pikkorissartinneqassammata. Sulisut taama ilinniartinneqarnissaannik piumasaqaateqarnermi tunngavigineqartoq tassaavoq imigassamik aalakoornartortalimmik atornerluinerup pitsaaliorneqarnerata nukittorsarneqarnissaanik aammalu unnuaanerani pissutsit toqqissisimanartuunissaannik Naalakkersuisut kissaateqarnerat, Peqqissutsimut naalakkersuisoq Agathe Fontain taama oqarpoq.
AAMMA ATUARUK Naalakkersuisut saqisunut imigassallersinnaanermut pikkorissaasalissasut
Sulisitsisut sulisullu akisussaassuseqartumik nioqquteqarnissamut sassaallertarnissamullu internetikkut pikkorissarnermut nittartakkakkut certifikat.gl-ikkut peqataasussatut nalunaarnissamut februaarip aallartinneranili periarfissaqalerput.
Akisussaassuseqartumik sassaallernermik pikkorissartitsineq sassaallertarfinni sulisunut naleqqussagaavoq, akisussaassuseqartumillu nioqquteqarnermik pikkorissartitsineq niuertarfinni imigassanik aalakoornartortalinnik nioqquteqarnermik sulisunut nalequssagaalluni.
Pikkorissartitsineq pillugu nittartagaq februaarip ulluisa 15-ianni iserfigineqarsinnaalissaaq, atuisunullu peqataaniarlutik nalunaartut pikkorissarnerit pillugit iserfissanik nassinneqarsinnaalissapput.))
Sulisut imigassanik aalakoornartortalinnik tuniniaanermik sassaallertarnermilluunniit suliaqartut akisussaassuseqartumik sassaallernermik tuniniaanermilluunniit pikkorissarnermi peqataasimanissaat akuersissummik pigisaqartut akisussaaffigaat.
