Aleqap immikkoorniartut siuttuat naapikkusukkaa
Aleqa Hammondip cataloniamiut immikkoorniartuisa siuttuat, Carles Puigdemont, Danmarkimut ullumi tikeraartoq, naapikkusuppaa. Attaviitsoq KNR-imut mailikkut taama allappoq.
Immikkoorniat siuttuat tigusarineqarsinnaagaluarluni Københavns Universitetimi oqallinnermut Folketingimilu ataatsimiinnermut peqataajartorluni Danmarkimut ullumi tikippoq.
AAMMA ATUARUK Aaja Chemnitz Larsenip Carles Puigdemont ataatsimeeqatigerusunngikkaa
Arlallit peqataanianngitsut
Folketingip nunanut allanut tunngasunik ataatsimiittartuini, Kalaallit Nunaannut tunngasunut ataatsimiititaliaani Savalimmiunullu ataatsimiititaliaani ilaasortat Folketingimi ataatsimiinnermut, savalimmiormiut folketingimut ilaasortaatitaannit Magni Argemit aaqqissuunneqartumut, qaaqquneqarput.
Folketingilli politikeriisa qaaqquneqartut arlallit, taakkunani Aaja Chemnitz Larsen ilaalluni, Carles Puigdemontimik ataatsimeeqateqarnissamut peqataaniaratik nalunaarutigereeraat, Sermitsiaq.AG allaaserisaqarpoq.
Spaniami unnerluussisussaatitaasut Puigdemontip Danmarkimi tigusarineqarsinnaanissaanik Spaniamullu kingusinnerusukkut tunniunneqarnissaanik qulakkeerinninniarlutik Spaniami eqqartuussivik europami nutaamik paarnaarusseqqussuteqaqquniarlugu Puigdemontip Danmarkimut tikeraarnera sioqqullugu sioorasaarutigaat.
AAMMA ATUARUK Cataloniap namminersortuunera atuukkunnaarsinniaraat
Taamaattoq Puigdemont Danmarkimut ataasinngornermi ullaakkut tikippoq.
Immikkoorniartut siuttuata Cataloniap Spaniamit avissaarnissaanut taasisitsinermut, Spaniap inatsisai naapertorlugit unioqqutitsisumut siulersuinermi kingorna nunagisaminit qimarngusutut Belgiami inuulerpoq.
