Aleqa akerlerisami pitsaanersaannik toqqaasoq
Folketingimut ilaasortap Siumumeersup Aleqa Hammondip nittartakkamit politikkimik sammisaqarfiusumit Altinget.dk-mit apersorneqarnermini oqaatigaa, Søren Espersen Dansk Folkepartiimeersoq ataqqillugu, aammalu politikkikkut akerlerisami akornanni ataqqisarinerpaallugu.
Aamma atuaruk Søren Espersen: Isumaginninnermut suliassaqarfik Danmarkip tigugallartariaqarpaa
Aamma atuaruk Søren Espersen: Danmark utoqqatsertariaqanngilaq
- Oqaatigerusutama akerlerluinnaanik oqartuaannarpoq, Aleqa Hammond ilaatigut taama oqarpoq nangillunilu:
- Nunarput kalaallillu pillugit quianartunik aammalu piviusorsiunngilluinnartunik eqqarsaateqartuuvoq. Nunarpulli soqutigisaqarfigalugu Nunarput pillugu apeqqutini oqalliseqataasarpoq, Aleqa Hammond ataqqinnippalulluni taama oqarpoq.
Namminersorneq pillugu isumaqatigiissut tulluusimaarutigigaa
Politikkikkut isumaqatigiissutini pitsaanerpaatut suna angusimanerlugu aperineqarami, Aleqa Hammond akivoq, namminersorneq pillugu isumaqatigiissutip piviusunngortinnissaanut eqeersimaartumik peqataasimalluni.
Aamma atuaruk Søren Espersenip namminersorneq pillugu inatsit isornartorsiorpaa
- Isumaqatigiinniutigineqarnerani peqataanngilanga suliamulli akuuvunga, imarisaalu innuttaasunut paasissutissiissutigalugu. Isumaqatigiissutini akuuffigisimasanni pingaarnerpaajuvoq, tamannalu tulluusimaarutigisupilussuuara, Aleqa Hammond taama oqarpoq.
Kiisalu 2016-imut aningaasanut inatsisissaq Nunatsinnut tunngatillugu pitsaanerusoq Aleqa Hammondip qilanaarinerarpaa. Aammattaaq Folketingi aqqutigalugu Nunatsinni inatsisitigut isumannaatsuunissap qulakkeerneqarnissaanut danskit naalakkersuisuinik tinnersaassalluni oqaatigaa.