RAL nassuerpoq: Akulikippallaamik kinguaattoortarpugut
Royal Arctic Linep umiarsuaataani kinguaattoornerit amerlavallaat containerinillu nillataartitsisunik kukkusumik passussinerit pissutigalugit ulluinnarni atortussanik pisiniarfiutilik Brugseni umiarsuaatilimmut sakkortuumik isornartorsiuivoq.
Brugseni naapertorlugu nioqqutissat kingusippallaamik tikiunneqaraangata ulluinnarni atortussanik pisiniarfinni qaavatigut annertuumik aningaasartuuteqarnermut annertunerusumillu naammaginninnginnermut RAL pisuusarpoq.
RAL-imilu pisortap Verner Hammekenip nassuerutigaa umiarsuit Nuummukartut amerlavallaat kinguaattoortartut.
- Tassa taamaappoq. Nuummut piffissaq eqqornagu tikittarnigut akulikippallaarput. Ukioq mannaannaq tikittut 10 procentit missaat piffissaq eqqukannerlugu tikittartut takusinnaavarput. Tamanna mumisikkusupparput 80-85 procentinngorlugu, oqarpoq.
Nioqqutissammi kingusinaarlutik tikikkaangata tamanna pisiniarfinnut akisoorujussuuvoq.
Brugseni naapertorlugu ukioq mannaannaq nioqqutissat 1,3 millioner koruunit tikillugit nalillit iginneqartariaqarsimapput, nioqqutissat ullulerneqarnerinut qajannaatsut kingusippallaamik tunniunneqarsimanerat imaluunniit containerit nillataartitsisut kukkusumik passunneqarsimanerat pissutigalugit ajortissimanerat pissutigalugit.
Tamannalu RAL-imi pisortap aamma uggoraa.
- Akuersaarneqarsinnaanngilaq. Containerini pisut aalajangersimasut Brugsenimik eqquisimasut pineqarput. Immikkuullarilluinnarput, kisianni qanorluunniit naammaginanngilluinnarlutik.
Ingerlaarnissanut pilersaarutissaq nutaaq
Kinguaattoornerpassuit iluarsiiviginiarlugit Royal Arctic Line nutaamik ingerlaarnissanut pilersaarusiorniarluni aalajangerpoq. Umiarsuit ingerlaarnissanut piffissaqarnerulissapput, taamaalillutik kinguaattoorutaasinnaasut angumerinissaannut ajornannginnerusumik periarfissaqalissallutik, Verner Hammeken oqaluttuarpoq.
- Aarhusimit ulloq ataaseq missarluinnaanik siusinnerusumik aallartalissaagut. Piffissaq tamatumani sipaagarput aqqummi tamakkerlugu arriinnerusumik ingerlaarnermut atussavarput. Arriinnerusumik ingerlaarnerput pissutigalugu kinguaattoortoqalerpat sukkanerusumik ingerlaalissaagut angummanniarluta.
Umiarsuit ullumikkut sukkanissartik tamaat ingerlaartarput piffissamullu pilersaarutit sukangasoorujussuullutik, taamaammallu kinguaattoornissamut inissaqanngivillutik. Aallajaarnerunikkut tikiffissaq aalajangiusimaneqassaaq, umiarsuillu aqqutaani kinguaattuulissappata umiarsuit iliuuseqarnissamut inissaqartitsissallutik.
Umiarsuit taamaalillutik Nuummut pilersaarutit naapertorneralugit tallimanngornermi nalunaaqutaq arfineq marlunut tikissinnaanngussapput.
Ullormik nutaamik tikittarfeqalissanngilaq - suli
Kinguaattoornerpassuit containerinilu ajoqusernerit pillugit isornartorsiornerup saniatigut umiarsuit ullormik nutaamik tikittarfittaarnissaat Brugsenimit aamma ujartorneqarpoq. Ullumikkut tallimanngornermi tikittarput, ulluinnarnili atortussanik pisiniarfiutilimmit kissaatigineqarnerugaluarpoq pingasunngornermi sisamanngornermiluunniit tikittassasut, pisiniarfiit taamaalillutik sapaatip akunnerata naanerani pisiniartorpassuaqarnerani nioqqutissaateqarnissartik angumerisinnaassallugu.
Verner Hammeken oqaluttuarpoq, ulloq tikittarfik assersuutigalugu sisamanngorninngortillugu RAL-imit aamma allanngortinneqarusukkaluartoq, tamannali periarfissaqanngitsoq Danmarkimit Kalaallit Nunaannut umiarsualivinnut allanut pisussaaffeqarneq pissutigalugu.
- Allannguineq tamanna sukkasuumik pilersissinnaanngilarput. Umiarsualivinnut ilaanullu allanut ataqatigiissapput, oqarpoq.
Umiarsuaatilik taamaammat allamik aaqqiissutissarsisimavoq nutaamik ullormik tikittarfeqalerneranik nassataqanngitsumik, kisiannili tutsuiginarnerusumik tikittaffeqalersitsisussamik.
- Pilersaarut allanngortissavarput nalunaaqutaq arfineq marlunut tikiffissaq qularnannginnerulersillugu. Tamanna nalinginnaasunngorpat assersuutigalugu sisamanngornermi tikittalersillugu siunissami aaqqiinissatta tungaanut ernumagineqartut amerlanersaat piiarsinnaassagigut isumaqarpugut.
RAL ilisimatitsivoq ingerlaarnissanut pilersaarut nutaaq Naalakkersuisunit akuerineqarpat atuutilersinneqassasoq. Tamanna novembarimi pissasoq RAL-imit naatsorsuutigineqarpoq.
