Akisuanerit Festival 15-issaa pissaaq

Sapaatit akunnerata naanera appisimaarfissarsuuvoq, ukiumoortumik aaqqissuunneqartartoq Akisuanerit Festival tallimanngornermi arfininngornermilu tusarnaariarneqarsinnaammat.

Nipilersoriaatsit rock, hip-hip aamma reggae tusarnaariarneqarsinnaassapput. Tallimanngornermi rockiunerusut appisimaarneqartussat, arfininngornermi Danmarkimi nuannarineqarluartut hip-hopip dronningiatut taaneqartartoq Tessa aamma Wafande, Pharfar aamma Kaka appisimaassapput.

Festivaleqartillugu sinerissaminngaanniit tusarnaariat aamma tikerartarput, aamma ukioq manna. Aaqqissuisut ilimagaat isissutissat siornatulli nungussasut.

Inuillu qilanaaqaat. Soorlu Mimi Kreutzmann, Ilisimatusarfimmi ilinniartoq, Tessap arfininngorpat unnukkut tusarnaariarnissaanut qilanaaqaaq.

- Nuannarigakku, taavalu soorlu rappii ingasaruloortaramik, oqarluttuarpoq.

Naggataarniartut

Nunatsinneersut rockimik nipilersortartut Siissisoq – naggataavimmik appisimaaqatigiinniarput. Nipilersoqatigiit avissaalerput, aaqqissueqataasullu Christian Elsnerip tulluusimaarutigalugu oqaatigaa festivali aaqqissuussartik naggataarfiussammat.

-Taava Siissisoq naggataavilermat, tassa paasigatsigu pissangaammerpugut. Taavalu aamma soorunami arlaatigut tanngassimaarutigivarput festivalitsinni naggataaleramik, Christian Elsner, festivalimi aaqqissueqataasoq, Atlantic Musicimilu piginneqataasoq oqarpoq.

- Pikkunassamaaqaaq tallimanngorpat unnuakkut naggasiilerpata, nangippoq.

Suleqatigiit ulapputeqaat

Festivalimut piareersaanerit naammassilivinneranni suleqatigiit 70-it kajumissutsiminnillu ikiuuttut arlallit unnugu aallartinnissamut ulapputissat kingulliit suliaraat. Sulisummi marloriaatinngoraluartut, kajummissutsiminnik ikiuuttut pinngitsoorneqarsinnaanngillat.

- Immaqa sulisut amerlassusai taanna allaaneroqaaq ukioq manna. Siorna affaannaapput ukioq manna 70-it sinnerlugit sulissapput. Inuppassuaqartarami Ulapippallaartoqannginngiassammat taama aaqqiivugut, Christian Elsner oqarpoq.

Kajumissutsiminnik ikiuuttorpassuit barimi atisaajartarfimmilu naapinneqarsinnaajumaarput, aamma matulerisutut nipilersortussallu isersimaartarfianni nakkutilliisutut sulissallutik, Christian Elsner oqaluttuarpoq.

Kikkullu tamarmik ulapinnerat imminut akililerpoq, tusarnaariarfissammi matui ammariaannanngorput.

- Aatsaat taama appittoqarnissaanut piareersimatigigunarpugut. Sulisorpassuit ikiuunnerat pissutaavoq, oqarpoq.