Akiitsut aningaasaliisarnermullu periusissiaq nutarterneqarusuppoq
Nuummi nioqqutissanik containeriisivissarsuaq nutaaq, mittarfiit marluk tallineqarnissaat immallu naqqatigut kabelip tallineqarnissaa Namminersorlutik Oqartussat sanaartugassaannut akisuunut ilaapput.
Akiitsunut aningaasaliisarnermullu periusissiaq 2012-mi Inatsisartuni partiinit tamanit akuersissutigineqartoq malinneqassappat, sanaartugassanut aningaasaliinissat pinngitsoortinneqarsinnaasut ernumassutigineqarpoq.
Aamma atuaruk Siunissami aningaasaliiffissat Inatsisartut eqqartorpaat
Taamaammat Naalakkersuisunit partiinillu naalakkersuisuutitaqartunit, missingersuutit pillugit inatsisip nutarterneqarnissaa kissaatigineqarpoq.
Aningaasanilli amerlanernik attartugaqarsinnaanissaq tamassumunnga tunngaveqavinngitsoq, Siumut sinnerlugu Inatsisartut aningaasaqarnermut akileraartarnermullu ataatsimiititaliaani ilaasortaq, Jess Svane oqarpoq
- Oqarpugut upernaamut paaserusutavut paaseqqaarusuppagut. Tassa sumut killeqartillugu aningaasanik attartorsinnaanerluta, Jess Svane oqarpoq.
Aamma atuaruk Mittarfiit pillugit pilersaarut akuersissutigineqarpoq
Oqaaseqaateqaqqusineq itigartitsissutigineqartoq
Akiitsunut aningaasaliisarnermullu periusissiaq Inatsisartuni ukiaq manna eqqartorneqarmat, Inuit Ataqatigiit siunnersuuteqareersullu, pineqartoq pillugu Naalakkersuisut piumaffigineqassasut, ataatsimoorussamik oqaaseqaateqaqqullugit.
Siunnersuulli tamanna partiinit naalakkersuisuutitaqartunit itigartitsissutigineqarpoq, tamannalu Inuit Ataqatigiit aningaasaqarnermut oqaaseqartartuata ernumagaa.
- Naalakkersuisut partiillu naalakkersuisuutitaqartut oqallittoqarnerani akiitsut aningaasaliisarnermullu periusissiamut tapersersuinissartik takutinngimmassuk, ersernerluttumik ernumanartumillu takutitsipput. Piffissamilu aningaasarpassuarnillu atortussaanitsinni tamanna pimmat ernumanartoqartipparput, Naaja Nathanielsen oqarpoq.
Aamma atuaruk Nuummi mittarfiup 2200 meterinngortinneqarnissaa Naalakkersuisunit ammaanneqarpoq
Periusissiaq nutartertinneqarusuttoq
Siumut missingersuutit pillugit inatsisip saqqummiunneqarnissaa utaqqeqqaarniarmassuk, ilaatigut Inuit Ataqatigiit ataatsimoorussamik oqaaseqaqqusinerat itigartinneqartoq, Jess Svane oqarpoq.
Aamma Demokraatit periusissiap allanngortinneqarnissaa aamma piumasarivaat, Tillie Martinussenillu periusissiaq 2012-imeersoq pisoqalisimasutut taavaa.
- Nunatta karsia akiitsoqalertissagutsigu eqqarsarluaqqaartariaqarpugut. Periusissiaq 2012-iminngaanneersoq qangarnisaalaartoq nutartertikkusupparput, Tillie Martinussen oqarpoq.
Aamma atuaruk Ilulissani mittarfiup tallinissaa pisariaqartinneqarpoq
