Siunissami aningaasaliiffissat Inatsisartut eqqartorpaat

Taassuma ataatsimut isiginiarpai nuna tamakkerlugu sanaartugassanut pilersaarut Namminersorlutik Oqartussani, kommuunini aamma suliffeqarfinni Namminersorlutik Oqartussanit pigineqartuni. Taakku saniatigut ilinniartitaanerup annertusarnissaa sammineqarpoq ilaatigut ilinniartitaanerup aaqqissuussaanera qimerluuataarneqassalluni. Aamma pingaartinneqarpoq isumaginninnikkut avatangiisitigullu attanneqarsinnaasumik pilersaarusiornissaq. Maannami inuit noorarput suliffik apeqqutaatillugu taamaattorli naammaginartumik akilimmik inissarsinissaq ajornartorsiutaalluni. Tamakku saqqummiunneqareermata partiit oqaaseqaamminnik saqqummiussipput.

Illutungiliuttuni partiit anginersaasoq Siumut taarsigassarsiniarnissamut mianersoqqusivoq maanna innuttaasut agguaqatigiisillugu 50.000 koruunik akiitsoqarmat. Per Berthelsenip eqqaasitsissutigaa maanna naalakkersuisuusut atuutilernissaat sioqqullugu Nunarput nunanut allanut akiitsoqanngitsoq. Taamaammat pilersaarutip allanngornissaa piumasaraa. Maannami akiitsut 2,7 milliarder koruuninngorsimapput. Taamaattoq Siumup naammagisimaarpaa aningaasaqarnikkut ilungersunartorsiortoqaraluartoq akiitsut akilersorneqarsinnaammata inuiaqatigiinni atugarissaarneq innarlinngikkaluarlugu.

- Taamaattoq misissoqqittariaqarparput Nukissiorfiit aktieselskabinngorntinnissaat taamaasillutik nammineerlutik taarsigassarsiniarsinnaalissammat landskarsip aningaasaqarnera innarlinngikkaluarlugu. Taamaasilluni taarsigassarsiniarnerput Nukissiorfiit siunissami akornusersinnaajunnaassagaluarpaat aammalu akiitsut erniaasa siunissami amerlavallaalernissaat pinngitsoorsinnaassallutigu, Per Berthelsen Siumut sinnerlugu oqarpoq.

IA-kkut Naalakkersuisut isumaqatigaat oqariartuutigimmassuk aatsaat taarsigassarsisoqartassasoq misissuinerit takutikkaangassuk ilumut taarsigassarsiat akilersornissaat akissaqarfigineqartoq. Allatut iliornissaq akisussaassuseqanngitsuliornertut isigaat. IA-kkut aamma Naalakkersuisut isumaqatigaat siunissami nunaqarfinni illuliornerup tapersersorneqarnissaa taamaasilluni nunap ilaa inukikkaluarluni ineriartornissamut periarfissaqarniassammat.

- Iluarsartuussinissamut Kalaallit Nunaanni pisariaqartinneqartut 6 milliarder koruuninik naleqarput taamaammat ataavartumik iluarsartuussisarnissamut aningaasaliisoqartariaqarpoq siunissami aningaartuutissarpassuit ikilisarniarlugit, Naaja Nathanielsen IA-meersoq oqarpoq, aammalu Naalakkersuisut isumaqatiginerarlugit ukiuni aggersuni aningaasaliiffigineqartussat tassaasariaqartut ilinniartitaaneq, utoqqaat najugaat aamma peqqinnissaqarfik.

Demokraatit kaammattuutigaat ilinniartitaaneq sammineqassasoq erseqqissarlugulu tamanna pillugu suliniarne meeqqerivinni aallartereertariaqartoq, taamaasillutik meeqqat atualernissaminnut piareersarneqarniassammata atuartuuneq tamatumalu nassatarisai pillugit. Ilinniartitaanerummigooq nukittorsarneratigut taamaallaat nunarsuarmioqatitsinnut unammillersinnaalerumaarpugut. Tamatuma saniatigut Demokraatitn kaammattuutigaat isertitanut akileraarut apparneqartariaqartoq.

- Demokraatit ukiut arlallit sulissutigisarsimavaat sulinermi isertitanut akileraarutip apparnissaa, tamannali pillugu taperserneqata. Taamaammat Aningaasaqarnikkut ingerlatsineq pillugu nalunaarut aamma Taarsigassarsiniarnissamut aningaasaliinissamullu 2012-mi pilersaarut aqqutigalugu Aningaasaqarnermut Naalakkersuisup oqariartuutaa nuannaarutigaarput ammaffiginerarpamgu sulinermi isertitanit akileraarutip procentimik ataatsimilluunniit appartinnissaa. Tamanna aningaasanut inatsisissap isumaqatigiinniutiginissaani qaqilerneqalersaarpoq, Demokraatit sinnerlugit Andreas Uldum oqarpoq.

Kattusseqatigiit Partiiata pingaartioppaat Nunatsinni atuarfiit pitsanngorsaavigineqarnissaat iluarsaassinissamullu ukiumut aningaasaliissutigineqartartut 80 millioner koruunit qaffanneqarnissaat kaammattuutigalugu. Kattusseqatigiit Partiiata ilaqutariit meeqqallu peroriartornerat pingaartitatut taakkartorpai. Meeqqat siunissaraagut taamaammat meeqqat atugaasa pingaartillugit sammineqarnissaat pingaartippaat. Taassuma saniatigut iluarisimaarpaat Taarsigassarsiniarnissamut aningaasaliinissamullu 2012-mi pilersaarut.

- Kattusseqatigiit Partiianniit aamma  nuannaarutigaarput Naalakkersuisut pilersaarusiorniarmata 2025 ilanngullugu, tamannami ukiorpaalunni ujartorsimavarput Akileraartarnermut atugarissaarnermullu isumalioqatigiissitap tikkuareermagu, minnerunngitsumik aningaasaqarniarnikkut maanna inissisimanerput tunngavigalugu, Knud Fleischer naqissusiivoq.