Nuup eqqaani nukissiorfimmi Utoqqarmiut kangerluarsunnguani, tallimanngormat sulinermut atatillugu ajutoortoqarujussuarmat, angutip 63-nik ukiullip, montøritut sulisup qitini napivaa.
Angutip sulinermi nalaani, saviminernik tonsip affaanik oqimaassusilimmik nakkarfigitissimavoq, Dronning Ingid-illu napparsimaviata nalunaarnera naapertorlugu, angutip sivisunerusumik ajoqutigissanngisaanik qitini napisimavaa.
Ajoqusertup suleqataata takusimasai eqqarsaatigalugit, angut ajoqusertoq iluatsitserujussuarsimavoq.
- Takunnissimasut oqaluttuarneri naapertorlugit angut iluatsitserujussuarsimavoq, Nuummi politeeqarfimmi stationslederi Bent Heiselberg oqarpoq.
Qulimiguulik ajoquteqarmat, ajoqusertoq angallammik aaneqartariaqarsimavoq.
Ajoquserfiup nalaani politiit misissuereerlutik assilisat nalunaarutillu nalilerneqartussanngorlugit, sulinermut nakkutilliisoqarfimmut ingerlateqqinneqarput.