Air Greenlandip ukiumi angusat “naammagisimaarnarnerarai”
Air Greenland ukioq manna angusarissaarnerpaanngilaq. Angutsat siorna akileraannginnermi 60,8 millionit koruuniupput.
2023-mi ukiumut angusat annerulaarput – tassa akileraannginnermi 84,5 millionit koruunit.
Taamaakkaluartorli Air Greenlandip 2024-mi ukiumi angusat ”naammagisimaarnarnerarpai”. Timmisartuutileqatigiiffiullu nittartakkamini nutaarsiassiinermini ”ukioq annertuunik allanngorarfiunerarpaa”.
Ukiumi angusat maajip tallimaani tamanut saqqummiunneqassaaq.
Piffissami eqqusisinnaannginnermut 100 millionit koruunit
Nuummi mittarfiup nutaap novembarimi ammarnera Danmarkimiillu atlantikoq qulaallugu timmisartup Kangerlussuakkooqqaarnani illoqarfiit pingaarnersaannut ingerlasinnaalernera allannguutit annerpaartaraat. Tamannali piffissami eqquinnginnerit arlaqarnerannik timmisartorsuullu Nuummi mittarfiup quasarnera imaluunniit anorersuarnera pissutigalugu missinnaanani Københavnimut uteqqittariaqartarneranik kinguneqarpoq.
Timmisartuutileqatigiiffik naapertorlugu ”piffissamik eqquisinnaannginnermut 2024-mi aningaasartuutit 100 millionit koruuniupput”.
Tamatuma saniatigut silarlunneruvoq, tamannalu taamaatitsinernik aamma ineqartitsinermut nerisaqartitsinermullu aningaasartuuteqarnermik kinguneqarpoq. Silap pissusiata allanngoriartornera silap allanngorarneranut pissutaanerarneqarsinnaalersoq, Air Greenlandip siorna toqqaannartumik oqaatiga, timmisartuutileqatigiiffiullu silap allanngorarnerunera suli ilungersunarnerusoq ukioq manna aamma nalunaarutigaa.
Motorit akisuut
Siornalu aningaasartuutit ukioq manna qaffannerannut teknikkikkut aserfallatsaaliuinerit, toqqaannartumillu tunisassiornermut aningaasartuutit amerlineri pissutaasut ilagaat. Qulimiguullit marluk Airbus H225 AWSAR-it motorii 20 millionit koruuninik saniatigut aningaasartuuteqartitsipput.
”2024-mi Air Greenland sanaartukkanut pigisanut 357,3 MDKK-nik aningaasaliissuteqarpoq, maannalu qulimiguullit H125-t kingulliit tiguneqarnerini timmisartunik nutarterineq naammassivoq”, timmisartuutileqatigiiffik nalunaarpoq.
